Seizcin fat rumz lai, rumz gojnwngz rox yinxfat baenz gak cungj binghlah, lumj dwgliengz、baenzngoz、liuznauj、dokraemx、benjdauzdij fatyiemz、feiyenz daengj bingh, ndigah, seizcin aeu haeujsim fuengzceih binghriuzhengz.

Seizcin dwg aen geiqciet doeng hah doxlwnz ndeu, mbwn yaep nit yaep raeuj, yaep bumz yaep gvengq. Aenmbwn mbouj onjdingh, gij vunz doiq aenmbwn mbouj onjdingh miz minjganj haenx couh mbouj daih hab'wngq lo. Ndigah, boux doiq aenmbwn minjganj aeu haeujsim ninzhwnq cij ndaej.

Aenmbwn bienqvaq doiq heiqlwed ndang vunz yingjyangj gig daih. Lumj mbwn nit seiz heiqlwed giet gongj caem youq, mbwn ndat seiz heiqlwed doengswnh lae baedauq. Seizcin aenmbwn bienq raeuj, heiqlwed hozdung hix gaenriengz gyagiengz, ndang vunz sup haeuj caeuq baiz ok haemq hoengh. Doiq cungj bienqvaq neix, boux ndang ndei gojnwngz sikwngq haemq vaiq, boux ndang yox bingh lai couh nanz sikwngq lo, bingh gaeuq fukfat roxnaeuz engqgya haeuj naek, ndigah, seizcin aeu caeux cunjbei guh ndei gak cungj bingh fuengzceih cij ndaej.