Seizcin ceiq yungzheih baenz hangzgauqmou, cungj bingh neix youz binghdoeg yinxhwnj, cujyau dwg song gemj foeggawh. 5 daengz 15 bi lwgnyez ceiq yungzheih baenz cungj bingh neix, doengzseiz yungzheih youq ndaw youwzyenz、siujyoz caeuq cuhcungh hagseng riuzhengz. Giz rwzduiq foeggawh, caemhcaiq buenx miz insep caeuq aj bak simhoj、fatndat、noix gwn doxgaiq daengj binghyiengh. Dingzlai lwgnyez aenvih bingh haemq mbaeu, cawjranz mbouj daiq yawjnaek fuengzceih. Danhseih aeu daezsingj dwg, nguh ceihyw rox yaeuhfat baenz naujmozyenz、yizsenyenz、sinhgihyenz、hoh in、gyacangsen baenz in daengj lai cungj bingh. Ndigah, baenz hangzgauqmou itdingh aeu gibseiz ceihyw cij ndaej.