Veiz Gozcingh siengj gaem gienh saeh nei, cungjdwg gaem daengzdaej bae. Bi 1965 ndwencieng ngamq gvaq, de youh ciucomz Lij Yinhdanh、Hoz Gi、Yangz Yungzfeih、Yenj Hungzconh daengj vunz daeuj cienmonz ngeix- yaeng gij vwndiz henzdingz Namzningz ndaem faex loegvaq haenx. De giengzdiuh, fanzdwg gij seiqhenz dieg vunz youq haenx, cungj aeu ndaem doh faex. Ganbu gihgvan caeuq siminz, bouxboux bibi cungj aeu camgya yivu ndaem faex 7 daengz 15 ngoenz. De lij lai baez yungh ngoenzyietnaiq caeuq Lij Yinhdanh、Yenj Hungzconh daengj vunz bae daengz Sihyanghdangz、Laujgouj、Yungjhoz daengj gij dieg henzsingz neix, diemjcaz hong cauh ndoeng loegvaq.

Bi 1965 ndwen 9, Veiz Gozcingh bae diegrog ywbing liuzyangj, hoeng de ciuqyiengh nanz lumz gij hong loegvaq Si Namzningz. Ndwen 7 ngoenz 15, de youq Sanghaij dwk dienhvah hawj boux suhgi siveij gonq Namzningz Siuh Hanz, naeuz: “Aeu laebdaeb gaem ndei cauh ndoeng loegvaq. Hong bwhhoenx caemh aeu cagaenj, hoeng gaej aenvih guh bwhhoenx cix lumz guh hong loegvaq. Daih’it aeu laebdaeb demgvangq suen’golwg, demgya binjcungj ndei; daihngeih, aeu ganq ndei gij faexlwg gaenq ndaem haenx, noix golwg nei aeu bouj caez bae, go iq go nyieg nei aeu dawz bwnh daeuj viq.” De lij cingj Siuh Hanz bae ra Lij Yinhdanh doxyaeng, guh geij diuz roenraemhfaex. De genyi: Suen Gunghyez Baihnamz Dah daengz ciengzfeihgih、 Guengjsae Daihhag daengz Gvangjsih Minzcuz Yozyen song diuz roen neix, ganjdienhsienq mbouj ndaej gyaq youq gwnz roen, mienxndaej nguh gij faex henzroen majhung. De naeuz, mbangj roen Sanghaij godoengz Fazgoz maj ndaej haemq ndei, seizneix gij dieghenz Gvangjsih Yihyozyen caemh ndaem dingz gofaex neix, hoeng aenvih miz dienhsienq gvaq dingjfaex, gofaex ciengz deng raed nga, yienghneix dingz gofaex neix cungj maj mbouj ndei.

De gig yawjnaek gij faexloih loegvaq Namzningz Si, lai baez caeuq Cinz Yinggih、Lij Yinhdanh、Yangz Yungzfeih、Yenj Hungzconh、gij canghhag ndoengfaex doxyaeng, youq Namzningz, ndaem gijmaz faex loevaq ndaej engqgya ndei, ndaej engqgya yienh’ok daegsaek Namzningz. Mbangj vunz nyinhnaeuz, Faexfungh- vuengz dwg sam cungj gofaex okmingz seiqgyaiq ndawde cungj ndeu, hai va le hoengzfiengfieng baenz feiz bae, wnggai lai ndaem.

(caengz sat)