Cin daengz mbwn hai raeuj

Gyaeujbi doenghva hai

Duzrwi gvax gvaq byai

Mbungqmbaj lai daeuj lienh

Byaij haeuj seizcin ma

Roeg hemq va youh lig

Raemxrij sawdikdik

Seiqhenz gig gyaeundei

Roegenq daeuj gonq cin

Mbin hwnj mbwn doxlaeh

Eu fwen youq byaifaex

Gaenx daeh namh guh rongz

Gyoengqvunz youq gyangnaz

Ganj muengz ma cae rauq

Bwh ndaem haeuxcaujdau

Caux dieggyaj ndaemcin

Nungzyez yendaiva

Gaijgwz ma haeujlaeg

Miz Cungguek daegsaek

Fazcanj yaek bae nyaemz

Singz mbanj yizdijva

Cwngcwz ma dingh hab

Siengj gak cungj banhfap

Hab ik ndei “sanhnungz”

Cazyanghgih roengz naz

Majdaz yiengjhoho

Gih bae gyaj saep(cap) go

Ngaek gyaeuj coh vunz riu

Cin ndaem it naed ceh

Cou sou de fanh gaen

Vunz gaenx haeux couh baenz

Liengz ngaenz caez doh yungh

Nungzyez dwg giekdaej

Gak nieb ndaej baengh’ing

Gensez caez buekmingh

Fazcanj dingh hoenghhwd

Seizcin gyaeu lumj va

Bangxbya faex venj mak

Bobaq raeuz ronghsag

Guekgya ak hwnjdaeuj