Mboengqneix,《Daxboh Bae Gizlawz》hoengh lo, cizciz ngaekngaeu simvunz, song hamq sam dieg, ndawsingz lajmbanj bouxsai mehmbwk bouxlaux lwgnyez, cungj haengj boenq yawj, daiq gou hix caez miz faenh. Ciz 《Doxvuenh Daxboh》 gou ceiq yaenx, hawj gou naemj daengz haujlai haujlai.

Baez doxvuenh daxboh, bouxlaux caenh siengj guh ndei “daxboh moq”, hoeng geij boux lwgnyez cix miz boux daej miz boux riu.

Daeglwg Cangh Lieng heuhguh Daegngoenz, de haengj “daxboh moq” Denz Lieng, aenvih ngamq yienfwngz “daxboh moq”, Daegngoenz couh guh’unj yaek “gwih max”. De heuh Denz Lieng gongzyongq roengzdaeuj, Denz Lieng gongzyongq lo, hoeng Daegngoenz benz mbouj ndaej hwnjbae. Denz Lieng mbouj rox de yaek guh gijmaz, couh cam de. Daegngoenz naeuz de siengj “gwih max”. Denz Lieng couh naeuz “neix yungzheih dangqmaz”. Denz Lieng doq gangj, doq heuh Daegngoenz ndwn baihnaj, song fwngz yaepyet couh gingz Daegngoenz hwnj gwnz gyaeuj mbaeumbeng, caiq hawj de song ga hamj gwih youq gwnz mbaq “gwih max”. Neix caen singjsien, Daegngoenz caengz raen gvaq, ndigah gamjdaengz youh geizheih youh doeksaet, riugakgak mbouj dingz, yaepyet de couh gig haengj Denz Lieng guh “boh” lo. Caemhcaiq daengz ciz 《Doxdax Caenh Mou》, daxboh de Cangh Lieng mbouj bang de caenh, de couh goen aeu vuenh Denz Lieng guh boh, caiq doxdax caenh mou.

Dahlwg Denz Lieng couh mbouj ndaej lo. Baez faen ndaej “daxboh moq” Linz Ciyingj, de couh daej- nganga. Yienznaeuz “daxboh moq” lox bae lox dauq, dahhaenx cungj itcig daej “gou yaek ra daxboh gou……”

“Daxboh moq” Kimi Goh Dauh, bingzciengz doiq daeglwg de Daegrin, dingzlai dwg hat roxnaeuz fok. Seizneix deng guh “daxboh” laeq iqet seiq bi neix, ndaek vunz hungsang neix mbouj gamj hat fok lo. De siujsimriri, vuenh gak cungj fuengfap mbouj doengz bae lox laeq nyez iq neix. Banringz yaek ninz, youh gangj goj lox ninz. Banringzgvaq Kimi caengz singj, seizneix heuh youh lau de guhnyah, “daxboh moq” couh menhmenh daj gyae daengz gyawj, gij sing heuh lumj ciengqgo nei……

Daengz gyanghwnz yaek lox ninz, Kimi caen cojgvaq, youh siengj daxboh swhgeij youh mbouj gamj daej. Deq Goh Dauh bae cung naijfwnj hawj de, de cij laeglemx uet raemxda. Goh Dauh cung naijfwnj haujlai nanz, cij dauqma lox Kimi……

Cingq lumj Goh Dauh naeuz haenx, bingzciengz de swhgeij nyaengq dangqmaz, gyawz miz seizgan guenj daeglwg, lienz cung naijfwnj hix dwg baez daih’it, geijlai naijfwnj boiq geijlai raemx, raemxgoenj roxnaeuz raemxraeuj, caen mbouj rox dahraix.

Doenggvaq mbat “vuenh daxboh” neix, geij boux daxboh cungj gamjdaengz, dang boh mbouj yungzheih, dang boh bouxwnq engq mbouj yungzheih ha.

Dwg ha, dang boh dang meh mbouj yungzheih, dang boh dang meh bouxwnq engqgya mbouj yungzheih. Dou dang lauxsae, neix mbouj dwg dang bohmeh “bouxwnq” ha? Bohmeh dwg boux lauxsae daih’it lwgnyez, dou lauxsae mbouj couhdwg boux bohmeh daihngeih lwgnyez ha?

Daj haenx daengz neix, dou guh bohmeh bouxwnq, mbouj engqgya aeu miz naihsim saeqsim caeuq gyaezsim ha? Danghnaeuz lauxsae dangq hagseng guh lwg swhgeij, hagseng guh mbouj deng, lij miz fad naek roxnaeuz caenh deuz lwi? ……