Youq ndaw singbauq bingbing bangbang, dou ciep daeuj ngoenzciet ceiq hung Cungguek raeuz——Ndwencieng. Ndaw ranz gou cang dwk ronghsagsag, venj daengloengz hoengz, nem fouqdoiq nding, vunz ndaw ranz miz di nyaengq……

Ndwencieng coit, youh dwg ngoenz sawj vunz angq he.

Baiq cieng sat le, gou daeuj daengz gwnz dieghoengq guhcaemz. Gyoengqvunz dawz baenz roix baenz roix bauq, diemj gij yinxbauq, sawqmwh bauqrengh dek bingbing bangbang, bauqva siksanq, ribfeiz myab rongh, lumjbaenz yaek soengq fuk hawj cien gya fanh hoh. Singbauq mbouj dingz mbouj duenh, nauhyied dangqmaz.

Yawj vunz cuengq bauq le, gou miz di mbwq lo, couh baema ranz gwnringz, caj yaepndeu caiq okdaeuj guhcaemz.

Gwnringz sat, gou iu geij boux baengzyoux itheij bae haw guhcaemz. Gwnz haw doxgaiq caen lai, gij doxgaiq gwn、 gij doxgaiq guhcaemz yienghyiengh cungj miz. Gou yawjraen ndaw diemq gai nienzgau, couh aeu gij leixseih daxgoeng daxbuz hawj haenx cawx gaiq he gwn.

Gou youh yawjraen aen diemq gai vanzgi he, ndawde gai mohfangh、muzouj、vunzgihgi…… Gou caen siengj cawx boux vunzgihgi he soengq hawj daegnuengx, hoeng siengj daengz daxboh daxmeh mbouj hawj gou luenh sawj cienz, couh mbouj gamj cawx lo.

Yienznaeuz mbouj soengq vanzgi hawj daegnuengx, hoeng ngoenzneix gou guhcaemz guh ndaej gig simhai. Caensim maqmuengh gyoengq baengzyoux iq daengx guek youq ndaw bimoq vaiqvued angqyangz, mbouj miz simnyap, ndeindei hagsib, ngoenzngoenz cinbu.

(Maj Hungz)