Ngoenzneix dwg ngoenzciet hung, gwnz gai gyanghongh cungj venj daengloengz nem doiq, dauqcawq hoengzfaengfaeng. Ranz gou hix venj daengloengz hoengzhwdhwd, ndaw ranz nem cih“fuk” guh dwk daengx ranz ronghsagsag. Gou daenj buhmoq, youq ndaw ranz buet dwk riu dwk angq dwk. Gyanghaemh, daxboh daxmeh cawj le congz byaek ndeigwn he, dou daengx ranz vunz doq gwn caeuz doq yawj cunhcez lenzvanh vanjvei, vanjvei gij cezmuz ndeiyawj haenx nyex dwk daxboh daxmeh riuhaha. Mwngz yawj, gij cazgi、siujbinj haenx, gij yenjyenz cungj yienj ndaej gig cingcaij.

Seizgan baenz faen baenz miux gvaqbae lo. Sing cung lingz diemj yiengj lo, “dang dang dang” seiz gyoengqvunz cungj doengh hwnjdaeuj, sing bauq yiengj bangbang mbouj dingz mbouj duenh. Gou hix caeuq daxboh roengz laeuz bae cuengq bauq, cuengq bauqva. Mwhhaenx, gwnzmbwn baenzlumj doek fwngim, gwnznamh baenzlumj hai va’ngaenz, daengx biengz cungj ronghlwenq saenqdoengh, gij neix buenx dwk sing angq sing riu, nauhyied dangqmaz. Gou youh angq youh diuq, hoh guekcoj raeuz engqgya hoenghhwd fouqgiengz, hoh guekgya raeuz engqgya fouqmiz.

Neix caen dwg haemhndaep nanzlumz he.

(Lanz Yi)