Moix bi yaek daengz cieng, aen soujgih daxboh cungj sou ndaej bak lai diuz saenqsik hohfuk, baihrog hix hoenghfwdfwd, gyoengqvunz cungj nyaengq dwk bae cawx huq gvaq cieng, boux dajgoeng hix ganj cawx doxgaiq hawj vunz ndaw ranz, baema ranz caeuq vunzranz doxcomz, lwnhgangj gij angqyangz、 dwgrengz swhgeij youq rog dajgoeng.

Bineix, ranz gou mbouj baema ranzmbanj, gou mbouj ndaej raen dahcej daeggo dahnuengx, hix mbouj ndaej raen yahdaiq ceiq ndiep gou haenx, ndawsim liengzsisi, yawjraen gyoengqvunz cungj baema ranz caeuq vunzranz doxcomz, sim gou hojsouh couh gaej gangj lo.

Cieng coit, haet romhromh daxboh daxmeh couh daj ndaw moeg rag gou hwnqdaeuj, hai ci daiq gou bae youz, gou lij caengz ndiu, moengjmoengj doengjdoengj seiz daeujdaengz diuz giuz raezrangrang he, diuz giuz neix raez daengz yawj mbouj raen gyaeuj, lumjbaenz caeuq mbwn doxciep nei, youq ndaw mok moengzmoengz loengzloengz gizgyae, baenz goengq baenz goengq bya yawj yaek raen mbouj raen, laj bya miz aen haij gvangqlangh mbouj miz bien, gwnz haij miz baenz aen baenz aen ruz, caen dwg ndeiyawj, gou gamjdaengz lumjbaenz youq ndaw diegsien, o, laxlawz neix couhdwg Couhsanh Hamjhaij Daihgiuz.

Ciepdwk, dou yaek naengh ruz bae Daujvadauz lo, naengh ruz caen mazfanz, cawx biuq、niemh biuq、doiq hauh ra dieg naengh, caen mazfanz! Naengh youq ndaw ruz yaep ndeu, gou raen gig geizheih, couh byaij daengz gyaeuj ruz yawj, youq song henz ruz, raemxhaij deng aen ruz bongh dwk doengh fubfab, byaij daengz rieng ruz yawj, cijraen raemxhaij daj laj ruz geuj okdaeuj biegsausau, rumzhaij bongj haeuj ndaw hozbuh gou, caen liengz!

Dou gig vaiq couh daeujdaengz Daujvadauz, dingqnaeuz gizneix dwg gizdieg goepingj 《Se Diuh Yinghyungz Con》. Gou yawjraen ranzmbanj Goz Cing——Niuzgyah Cunh, ceiq mizyinx dwg gou lienh byaij donghvadauz, dingqnaeuz bihaenx Goz Cing daeuj ra dahlwg Vangz yozswh Vangz Yungz seiz, Vangz yozswh heuh Goz Cing byaij donghvadauz. Gou lienh le haujlai nanz hoeng cungj lienh mbouj rox. Gou lij cawx aen naq nyingz yiuh he. Byaij gvaq aen youh aen gingjgih, gou lumjbaenz hix dwg bouxvunz ndaw gojgaeq nei lo. Raemxhuz gig gyaeundei, mbwn yaek laep lo, gou mbouj cingznyienh dwk lizhai Daujvadauz.

Youq gwnz loh maranz, gou lij maezvag youq ndaw gingjsaek Dauj- vadauz, cig daengz daxboh heuh gou, gou cij singj gvaqdaeuj. Daxboh cam gou:“Aen cieng neix baenzneix gvaq mwngz maij lwi?”Gou daihsing dap naeuz:“Cibfaen maij.”(Vaz Caij)