Ndwencieng coit, ranz caengz rongh, sing bauq couh yiengj bingbing bangbang, neix couh dwg bi moq ngoenz daih’it lo.

Dou ganjvaiq hwnqdaeuj, hwnqdaeuj ciepcoux ngoenzciet conzdungj——Ndwen- cieng. Baez daengz cieng, ranzranz cungj dajcang ranz swhgeij lwenqyabyab. Mwngz yawj, gou ngamq byaij ok dourug, couh yawjraen daxmeh dawz daengz、mak baij rim gwnz daiz……lij baij bog va hai angj he, ndeiyawj dangqmaz! Gou ganjvaiq daenj buhmoq, buet bae gwnzgai. Gwnzgai engq nauhyied lo, ranzranz bakdou cungj nem fouqdoiq, mbangj ranz lij venj gij daeng saek hoengz saek loeg haenx, yaep myab yaep myab, gig ndeiyawj. Mbangj ranz bakdou daengj gij bat ndaem gomakgam haenx, go de mbaw heu mak henj, camx da lai lo. Gwnznamh deng caengz sabauq hoengzhwdhwd he cw dwk, couh lumj fan danj he!

Gwnzgai gyoengqvunz baebae dauq- dauq, naj riu bak hix mbaeu, doxdongx cam ndei! Gyoengq lwgnyez yiengq bouxlaux baiq nienz, bouxlaux hix hoh gyoengq nyez vaiqvued, vaiq maj vaiq hung, lij hawj ngaenzleixseih dem. Gou riengz vunzlai byaij daengz aen yizloz cungsim ndaw mbanj, gizneix roq gyong roq laz yiengj daemj mbwn, youh miz foux lungz youh miz foux saeceij, gyoengqvunz guh gak cungj gak yiengh youzyenz hozdung angqhoh ngoenz cieng, nauhyied dangqmaz!

Neix couh dwg ndwencieng, ngoenzciet conzdungj sim’angq、 nauhyied ndeu!

(Maj Veivaz)