Cuk maenzcienz: Aeu 50 gwz maenzcienz dat naeng ndei, 50 gwz haeuxnaz, di dangzrwi caeuq di youz ndeu. Cab maenzcienz baenz gaiq, dwk youz cauj le gyahaeuj dangzrwi, cawj haeuxnaz baenz cuk, caiq ndingq maenzcienz roengz cawj goenj couh baenz gwn. Maenzcienz bouj mak mamx ceiq ndei.

Cuk maklaeq: Aeu 50 gwz maklaeq cawz byuk, 50 gwz haeuxnaz, di gyu ndeu. Dwk maklaeq ndip roengz gauhyazgoh bae gya raemx cawj cug, cawz byuk daem yungz dwk roengz haeuxnaz gaenq swiq ndei haenx bae, gya raemx cawj baenz cuk, caiq dwk di gyu ndeu diuzfeih gwn. Maklaeq ndaej bouj mak, doiq boux baenz heiqmak mbouj gaeuq yinxhwnj baenz hwet naet gyaeujhoq naiq miz bangbouj ceihyw cozyung.

Cuk lwgraz: Aeu 10 gwz lwgraz, 50 gwz haeuxnaz, dangzrwi caeuq gyu gak di ndeu. Sien cauj lwgraz rang, caiq cawj haeuxnaz baenz cuk gyahaeuj lwgraz, dwk dangzrwi caeuq gyu diuzfeih gwn. Lwgraz hau ndaej leih saej bouj heiqbwt; lwgraz ndaem ndaej haeuj mak nyangq nyinz.

Cuk makleiz: Aeu 3 aen makleizbit dat naeng cawz ngveih ndei le ronq baenz gaiq, dwk raemx cawj buenq diemj cung, caiq swiq haeuxnaz cawj baenz cuk gwd, yaek cug seiz caiq gyahaeuj makleiz caeuq raemx makleiz caez cawj cug gwn. Ndaej nyinh bwt cing sim caeuq giep myaiz gyangq huj, doiq lwgnyez bwt ndat baenzae miz bangbouj ceihyw cozyung.

Cuk haeuxnaz dungxvaiz: Aeu 200 gwz dungxvaiz, 50 gwz haeuxnaz, di gyu ndeu. Dungxvaiz dwk gyu nucat swiq seuq ronq baenz gaiq iq, caeuq haeuxnaz cawj baenz cuk, dwk di gyu ndeu diuzfeih gwn. Doiq yw boux lwgnyez bingh le ndang haw、gwn mbouj ndaej haeux、seiq genga naetnaiq gig ndei.