Bi’gvaq, Cungzcoj Si gyarengz vatgud nem senhconz vwnzva dangdieg, mboujduenh fazcanj minzcuz vwnzva canjyez, gyavaiq doidoengh haifat vwnzva lijyouz canjbinj, faexhoengz、denhginz vwnzva、vehdat Byaraiz、veh- ganjhaeux daengj buek minzsuz vwnzva henzguek nem feihvuzciz vwnzva yizcanj yaek raeglaemz de ndaej henhoh nem swnjcienz haemq ndei.

Dangqnaj, aen Bingzsiengz Faexhoengz Vwnzva Canjyezyenz roengzngaenz 15 ik maenz de cingqsik haigoeng, daengx si doenghboux gai faexhoengz de miz 1000 lai ranz, bi gaicawx mauhgvaq 30 ik maenz. Lungzcouh Yen doeng- gvaq coengh Lungzcouh Denhginz cujlwgmbwk caeuq mizgven yozyau、vwnzyi sedonz cauxguh cezmuz denhginz, ingjguh bouh denyingj Bouxcuengh heuhguh《Denhginz》. Doengzseiz, aen yienh neix laebbaenz Lungzcouh Denhginz Cauxguh Cangj, baenz buek doq denhginz, denhginz gaenq baenz cungj“gunghyibinj youq Gvangjsih ceiq ndaej vunz maij”ndeu. Bi’gvaq, aen si neix roengz cienz rengz guh hong vih Byaraiz bauq teihyiz, gyoepsuenq roengz gij cienzngaenz henhoh、yenzgiu Byaraiz nem vih Byaraiz bauq feihyiz de 6920 fanh maenz, ceng ndaej lied haeuj ndaw hanghmoeg 2016 nienz Cungguek bauq feihyiz de bae. Doenghgij vehganjhaeux aeu vehdat henz Dahcojgyangh、Lozyez vwnzva、gingj bya raemx daengj gij vwnzva Cungzcoj guh neiyungz de gyaciz gyahwnj gig lai, daengx bi veh baenz 1000 lai fuk, gai doh daengx guek, souhaeuj haemq lai. Doengzseiz, aen si neix gyarengz guh hong bujcaz, gungh soucomz gij riz feihyiz 8155 giz, caz hanghmoeg 200 aen. Daengx si gunghbu feihvuzciz vwnzva yizcanj mingzloeg 34 aen, ndawde《Fwencuengh Dahcojgyangh》、《Denhginz Yisuz》、 《Ndangdaenj Yauzcuz》daengj 11 hangh ndaej lied haeuj swcigih henhoh hanghmoeg.

(Liuz Cinghgveiz)