Mwngz vih swhgeij guh gvaq gij saeh haenx gag daekeiq caegcaeg riu gvaq lwi?

Ngoenzhaenx, daxboh daxmeh aenvih baenzlawz son gou siengjfap mbouj doengz, mwngz coenz gou coenz youq ndaw rug doxceng hwnjdaeuj, bonjlaiz gou nyinhnaeuz songde cij mbouj gvaq dwg doxdingj geij coenz, mbouj sieng maz hozheiq, hoeng mbouj siengj daengz daxboh daxmeh yied ceng yied haenq, song boux cungj gig huj, coenzgangj yied daeuj yied bongh, gij feih ywcungq daj geh dourug roenx okdaeuj lo. Daxbuz gig damsim, diem din diem fwngz byaij daengz bakdou rug caeg dingq, fwngz siengj nyoengx dou youh mbouj gamj nyoengx, lawq le yaep he youh byaij dauq lo, youq ndaw dingdangz byaij bae byaij dauq, gou bonjlaiz dwg yawj sawcuenh, hoeng seizneix hix mbouj miz simgei yawj lo, najbyak nyaeuq dwk, sim siengj songde baenzneix ceng roengzbae baenzlawz ndaej, veq gyaeuj yawjraen gij cenjcaz gwnz congz, miz banhfap lo, gou daek cenj raemxcaz he, nyoengx dourug dawz haeujbae, ndaw rug sawqmwh mbouj miz sing lo. Gou riuriu: “Meh, mwngz hozhawq loba, gwn di raemxcaz, mboujnex conghhoz in.” Doq gangj doq ndenq cenj caz hawj daxmeh, sat le byaij okdaeuj. Mbouj geij nanz, songde youh ceng hwnjdaeuj, lij yied ceng yied haenq, vih bauj daengx ranz vunz huzndei anningz, gou youhcaiq nyoengx dou haeujbae yawj, cijraen daxboh ngeng youq gwnz mbonq, daihsing gangj dwk, lij fwngz hwnj ga hwnj, daxmeh najhaen dwk ndwn youq henz, seiz mbouj seiz rongx geij coenz, gij yiengh de gig mbouj fug. Gou soeng gaemz heiq he:“Lij ndei, mbouj doxmoeb!” Baez yawj gwnz daiz, cenj caz daxmeh byouq lo, gou dawz cenj okdaeuj, daek raemxcaz rim le, caiq dawz haeujbae ndenq hawj daxmeh, dauqma caiq daek cenj he, dawz haeujbae hawj daxboh, lij lumj gig cingqging nei naeuz:“Boh, gou naemj mwngz haengjdingh hix hozhawq lo!” Baez dingq coenz neix, daxboh daxmeh cungj nyaenx mbouj ndaej riu lo, miz di mbouj ndei eiqsei. Gou okdaeuj le gven dou hawj songde, hix caegcaeg riu lo, gou rox daxboh daxmeh mbouj miz saeh lo, baez riu gej iencaeuz lo!

Sam cenj raemx ndaep ndaej ciengz feiz he, mbouj loek ba, gij conhli gou caemh ndaej ciq hawj sou yungh, bauj mwngz baezlaeng hix caegcaeg riu.

(seiq nienzgaep Niuj Vwnhhinh)