2013 nienz 4 nyied 23 hauh, ngoenz neix gou ceiq angq, aenvih ngoenz neix ndawde, gou ginglig le haujlai baez “baez daih’it”: Baez daih’it bae cunhyouz, baez daih’it naengh dungceh, baez daih’it youq yienhciengz yawj mohsuz biujyienj, baez daih’it yawj hangzmoz biujyienj, baez daih’it youz byafeiz gungh- yenz……Mboujgvaq sawj gou ceiq nanz lumz lij dwg gwn ring.

Yaek bae seiz, dou couh dingqnyi lauxsae naeuz, baez cunhyouz neix yaek daengxcungq bae henz haij gwn ring. Dou angq lai lo, cungj muengh vaiqdi daengz dieg. Youq gwnz loh, boux bakgvij okmingz ban dou Fangh Ginghbinj itcig “fwedgaeq, fwedgaeq, fwedgaeq”damz mbouj dingz. Gangj caen, dingq dwk gou gyaeuj cungj yaek ngunh lo! Gangj daengz fwedgaeq, byawz mbouj maij gwn ne? Dwg lwi? Hoeng dou ngamq hwnj ci, liz henz haij lij miz bak lai goengleix gyae, baenzlawz doq ndaej gwn ne! Hoeng Fangh Ginghbinj itcig damz, haih daengz caezgya cungj myaiz rih liux.

Lij ndei, dungceh hai caen vaiq, ngamq aen lai cungdaeuz couh daengz henz haij lo. Gyoengqdou cungj angq hemq hwnjdaeuj:“Sadan, dou daeuj lo!” Hoeng lauxsae lumj mbouj rox gij simsaeh dou, mbouj sikhaek daiq dou bae gwn ring, dauq dwg sien anbaiz dou bae ngonz cazgi caeuq mohsuz biujyienj. Gangj caen, cezmuz gig cingcaij, dou cungj yawj haeujmaez lo, mboujgvaq yawj dwk yawj dwk, ndaw sim gou lij seiz mbouj seiz naemj:“Seizlawz ndaej gwn ring ne?”

Gig mbouj yungzheih ngaiz daengz banringz cib’it diemj cung, yawj biujyienj sat le, lauxsae daiq dou bae gwn ring lo. Caen ndei! Laxlawz daujyouz caeux couh bang dou baij congz ndei lo, lij coemh danq deq dou. Dou faen nienzgaep moix cib boux naengh aen congzrin he, va! Sikhaek couh ndaej gwn ring lo! Fangh Ginghbinj baez naengh roengzdaeuj couh ra fwedgaeq:“Fwedgaeq ne? Fwedgaeq youq gyawz?” Mwh de hemqgva’gva seiz, Ciz lauxsae riuj daeh fwedgaeq he、daeh saejnoh he daengj daengj doengh gij doxgaiq yaek ring neix byaij gvaqdaeuj:“Gyoengq lwgnyez, fwedgaeq daeuj lo.” Ciz lauxsae bae gyawz rox, de youq gyae- gyae dou couh yawjraen de lo, dou itcig yawj de byaij daeuj, gaenbonj mbouj yungh daezsingj, hwnjdangz cungj mbouj baenz nyinhcaen ne.

Ciz lauxsae dawz cib gaiq fwedgaeq hwnj faj dietmuengx gwnz feiz bae, cat di diuzliuh caeuq youz, mbouj geijlai nanz, dou couh raen rangfwdfwd lo. Caezgya cungj cim- yawj, lwgda doengh cungj mbouj doengh, myaiz cungj yaek lae baenz diuz dah he lo. Miz di naeuz:“Va, caen rang!” Miz di naeuz:“Haengjdingh cibfaen ndeigwn!”Fangh Ginghbinj caekhaex naengh daengq mbouj onj, fwngz yaeb neix yaeb de, mbouj dingz dwk coi lauxsae:“Lauxsae, ndaej caengz? Lauxsae, cug caengz? Baenzlawz lij caengz cug ha, wnggai baenz loba?” Ciz lauxsae di he hix mbouj gip, fonj bae fonj dauq ring dwk, caemhcaiq lij hen dangj gij fwngz iq yaek bae vax fwedgaeq haenx, lij naeuz:“Gaej luenh doengh! Siujsim fwngz sou deng nad! Gaej gip, aeu ring cug cij ndaej, mboujnex gwn rox oksiq!”

Daih’iek gvaq cib lai faen cung ba, hoeng dou gamjdaengz lumj hwnj sam dangz goq baenz nanz. Lij dwg Fangh Ginghbinj ceiq linj, de swnh lauxsae mbouj haeujsim, caegcaeg vax aeu gaiq fwedgaeq he, doq oet haeuj bak bae gaet, bak de deng nad dwk aj bak ha ha. Vangz Swnhleij raen Fangh Ginghbinj gwn baenz rang, ndwnj myaiz oegoeg, nyaenx mbouj ndaej hix yaeb gaiq he. Gou hix mbouj fug saw, hix aeu gaiq he. Ciz lauxsae raen dou baenz gvij, riu mbouj ndaej daej mbouj dwg, naeuz:“Ndei lo ndei lo, gwn ba!” Ciz lauxsae baez hai bak, caezgya cungj ciengj gaiq he gaet hwnjdaeuj. Gou dawz bingz gojloz hung he, hemq naeuz:“Caezgya gaej cij guenj gwn, daeuj, dou bungq mbat cenj he!”

Ciep roengzdaeuj, Ciz lauxsae youh ring haeuxyangz、saejnoh、nohyuenz、daeuhfouh hawj dou, lij ring gij ndoksej gou gyaez haenx, dou gwn dwk biuhhoz biuhmingh!

Caezgya ciengj gwn ciengj gaet can he le, mwngz yawj gou gou yawj mwngz, mwngz vix gou gou vix mwngz, riu daengz dungxbyonj. Laxlawz gwnz naj dou caeux couh faen mbouj ok gyawz dwg ndaeng gyawz dwg bak lo. Hoeng mbouj miz saek boux guenj gijneix, lij dwg hai dungx gwn dwk、ndoet dwk、 gangj dwk、 riu dwk, angq daengz gijmaz cungj lumz lo, daengx aen danhaij cungj dwg gij sing riu dou.

(seiq nienzgaep Fungz Yoz- fangh)