Gou yawjraen daxmeh baet ranz. Yawj de baenzneix sinhoj dwgrengz, gou caen siengj bang de baet.

Ndigah gou naeuz:“Daxmeh, gou bang mwngz baet ba.”Daxmeh rubrub gyaeuj gou naeuz:“Baenz vei, baujboiq gou roxsoq lo.”

Ciep roengzdaeuj, dou itheij hainduj baet ranz, aenvih gou vunz iq rengz iq, mbouj baet geij mbat fwngz couh unq liux lo, gou caen siengj mbouj baet lo, hoeng siengj daengz daxmeh moix ngoenz baenzneix dwgrengz, gou itdingh aeu baet caez, baenz nanz cij baet baez he, mbouj naengz baet daengz byongh couh mbouj baet lo. Baet dwk baet dwk, ndaw ranz doeklaeng dauqdaej seuqsak lo, di nyapnyaj cungj mboujmiz lo. Gou siengj: Genhci mbouj cuengq fwngz cij naengz guh ndaej baenz saeh.

Baet ranz sat le, gou caeuq daxmeh cungj naiq yaek dai. Daxmeh haenhnaeuz gou caen naengzganq!

Baez baet ranz neix doiq gou daeuj gangj caen mbouj yungzheih, yienznaeuz gig naiq, hoeng ndaej bang daxmeh guh saeh ndawsim lij dwg angqfwdfwd.

(ngeih nienzgaep Maj Dahah)