Nohdouq feih diemz, loq liengz, gwn de ndaej bouj ndaw ik heiq、liengz lwed gej doeg、gaij hozhawq. Sei nohdouq saeq oiq, yungzheih deng ndang vunz siuvaq supsou, ndang vunz ndaej siuvaq nohdouq dabdaengz 85%, beij nohmou、nohcwz、nohyiengz siuvaq lai sang 10% daengz 35%. Ndigah, nohdouq ceiq hab gij lwgnyez siuvaq goengnaengz gemjnyieg caeuq bouxlaux gwn.

Danhseih, noh hix faen miz caep ndat raeuj liengz geij cungj, seizdoeng lai gwn di nohyiengz、nohma ndeu, doiq dingj nit daih miz ndeicawq. Hoeng, nohdouq loq liengz, ceiq ndei siuj gwn di, daegbied dwg boux dungx haw- nyieg、 boux baenz yiengz haw engq mbouj ndaej gwn nohdouq. Mboujnex, mboujdanh mbouj ndaej dingj nit, lij rox hawj vunz engq lau nit dem.

Linghvaih, nohdouq loq liengz, gwn lai rox sieng yienzheiq daibuenz, yinxhwnj lwgndawdungx cukcak mbouj dingz roxnaeuz daiqndang ok lwed. Ndigah, gij mehdaiqndang miz lonlwg ciudaeuz haenx mbouj hab gwn nohdouq. Cunghyih nyinhnaeuz, lwed bungz caep doq giet, vih mienx deng lwed giet yaeuhfat baenz dawzsaeg in, mehmbwk geiz dawzsaeg ceiq ndei gaej gwn nohdouq.