Lauxbaeg ndaej gwn guh byaek youh baenz yw, gwn ndip feih manh singq caep, gwn cug feih diemz loq liengz. Ndaw lauxbaeg cawz hamz miz dangzmakit、dangzoij、dangzmak、nyinzsei co、veizswnghsu daengj lai cungj gvangvuzciz caeuq di danbwz co ndeu le, lij hamz miz lai cungj anhgihsonh dem, gwn de ndaej demgiengz rengz dingj bingh, caemhcaiq ndaej hanhhaed aizsibauh sengmaj. Ngamq haicin gwn lauxbaeg gawq swnhheiq、ik dungx coi siuvaq, youh ndaej yawhfuengz dwgliengz.

Danghnaeuz gwn ndip, cix senj aeu aen raemx lai de swiq seuq ronq baenz sei le gyaux di meiq caeuq dangz ndeu gwn, yienghneix gwn soemjdiemz habbak. Danghnaeuz dawz de baek raemx dang caz gwn, ndaej mizyauq dwk bae yawhfuengz dwgliengz. Gidij guhfap dwg: Aeu gij lauxbaeg singjsien raemx lai 250 gwz, swiq seuq ronq baenz gep, dwk sam vanj raemx cawj daengz lw song vanj raemx, swnh ndat gwn vanj ndeu, gek diemj cung ndeu caiq gwn vanj daihngeih, ciuq aen fap neix bae guh lienz gwn sam ngoenz.