Gou gyaez gwn gyoij, aenvih aenndang de raezrangrang, lumj aen ruz iq he, youh lumj aen ronghndwen vauq he.

Song ngoenz gonq, daxmeh cawx be gyoij he hawj gou, aenvih gwn mbouj liux, ndigah gou dawz gyoij cuengq haeuj binghsiengh bae. Ngoenzneix gou hai binghsiengh yawj, fatyienh naenggyoij cungj bienq ndaem lo, mbek naeng de baez yawj, ndawde gij nohgyoij lij hau, gou gig doeksaet, ngeizvaeg dwk cam daxmeh, daxmeh hix naeuz mbouj rox. Ndigah gou caeuq daxmeh hwnjmuengx bae caz dapanq, laxlawz gij sibauh naenggyoij hamz cungj yangjvayausu he. Danghnaeuz gyoij deng nae roxnaeuz deng sieng, gij sibauhmoz de byoengq le, gij yangjvayausu ndawde deng gij yangjgi ndaw hoengheiq yangjva, cauxbaenz cungj doxgaiq saekndaem ndeu, naenggyoij couh bienq ndaem lo.

Gou rox dapanq le angq dangqmaz! Saeqsim cazyawj swnghhoz, youq ndaw swnghhoz fatyienh vwndiz, gaijgez vwndiz, caen dwg gienh saeh hawj vunz sim’angq ndeu!

(sam nienzgaep Van Hinhyez)