Camj lo camj lo, gou gingqyienz maez dwk dennauj youzhi. Mbat neix gou caen camj lo, cungj gvaiq gou nyinhnaeuz swhgeij ak dingj ndaej ciunyex. Gou ienqhoij cungj mboujmiz yungh lo.

Dauqngeix gaxgonq, gou ciengz dingq vunzhung itheij lwnh naeuz lwgnyez swhgeij maez dwk dennauj, daxmeh gou doq dingq doq gienq gou naeuz mbouj cinj gou dwk youzhi. Gou moix baez cungj mbouj naihfanz saek di ngaekngaek gyaeuj. Hoeng ndawsim gou caeux miz cungj siengjfap he: Gijmaz dennauj youzhi, lij rox hawj vunz hwnjyinx, gou cix mbouj saenq ne! Cungj miz ngoenz he, gou guh hawj sou yawj, couh suenq gou dwk dennauj youzhi, hix mbouj deng de maezngunh. Gangj daengz gizliux de mbouj gvaq dwg youzhi hane.

Baez haenx, gou youq gwnz dennauj caz swhliu sat le, raen daxmeh mbouj youq ranz, aenvih gamjdaengz geizgvaiq, hix nyinhnaeuz swhgeij haengjdingh mbouj rox haeujmaez, couh daihdamj dajhai “QQ youzhi”, labluenh diemj aen youzhi “dwk bop”, dwk mbat he le, mbouj rox mbouj nyinh ndaej hingz cib faen, gou angq dwk hemq hwnjdaeuj, lij bagyanyan nyinhnaeuz swhgeij seng daeuj couh ak dwk youzhi. Gou laebdaeb dwk, gijmaz saeh cungj lumz lo. Seizgan gvaq ndaej gig vaiq, daengz daxmeh ma le heuh gou gou cungj mbouj roxnyinh, de buet gvaqdaeuj baez yawj, sikhaek ndatheiq dwk naeuz gou. Gou miz di simsaenz, mbouj rox baenzlawz guh cij ndei. Hoeng dwglau gvaq le, hix miz naed ceh rwix ndeu doek youq ndawsim, caemhcaiq maj ndaej gig vaiq.

Riengzlaeng geij ngoenz, gou lumj deng fangz dawz nei, mbouj guenj seizlawz cungj siengj “dwk bop”, lij maqmuengh daxmeh vaiqdi okbae, hawj gou ndaej cwxcaih dwk ciengz he. Hoeng moix baez dwk sat le, gou youh gig sim’in gig ienqhoij, lwgda hix gig naiq, gyaeuj hix gig ngunh, guh gijmaz cungj mbouj baenz, saekmwh cix nyienh dai ne.

Doeklaeng gienq daihgya coenz he: Aeu dingq vah vunzhung, mboujnex rox deng gwnvi. Yawj gou, couh dwg aen yiengh rwix he.(Bangz Cwzhij)