Hai aen hab ndaejgeiq, aen dem aen ruz iq gak saek gak yiengh hai okdaeuj. Miz di yied hai yied gyae, miz di youq giz gyae yawj yaek raen mbouj raen, miz di louz youq baksok……Miz di dwg saek nding, gwnzde cang vaiqvued; miz di dwg saek mok, gwnzde cang nanzgvaq; miz di dwg saekceb, daibyauj sim soengsangj……

Youq ndaw hab ndaejgeiq gou, couh miz aen ruz saekmok he itcig louz youq baksok, aen ruz iq neix geiqloeg gienh saeh he. Seiq nienzgaep seiz ngoenz he, gou sij sat gij cozyez hagdangz heuh guh haenx, youh hainduj sij gij yijvwnz cozyez daxmeh heuh guh, gou nyinhcaen dwk guh sat lo. Daengz le gyanghaemh, daxmeh daeuj genjcaz gij cozyez de heuh guh haenx, daxmeh baez fan bonj cozyez, fwngz gaem gisongi vaiqvet dwk genjcaz le yaephe, sawqmwh naj couh haen lo, hujdengdeng lo, faj fwngz de gaem cozyez haenx miz di saenz, gvaq le yaephe, sikhaek hoizsaenz gvaqdaeuj, hatvava heuh: “Siujvangh, mwngz gvaqdaeuj!”

“Guh gijmaz?” Gou ngeizvaeg dwk cam.

“Mwngz lij gamj cam gou?”Daxmeh vix gij cozyez gou, rongx gou naeuz:“Gij neix couh dwg gij cozyez mwngz sij?! Mwngz seizlawz sij cih sij ndaej baenz ndeiyawj ha? Gou baenzlawz mbouj rox? Lauxsaed gyaudaih, dwg mbouj dwg daeggo dahceh daeuj ranz dou seiz bang mwngz sij?”

“Mbouj…… mbouj……mboujmiz ha. Dahcej ceiqgaenh cungj mbouj daeuj ranz dou, caiq gangj cozyez dwg gou ngoenzneix ngamq sij, dahcej baenzlawz bang gou sij ha?” Gou caegcaeg niengx gyaeuj yawj daxmeh, cijraen de najbyak nyaeuq dwk, ndaw da lumj ok feiz nei, gou dingqnyi de maenjheuj yiengjgatgat gig cingcuj. Najbyak gou fwt miz hanhheu conh okdaeuj.

“Mwngz yaeuh gou!” Daxmeh baez gingz fwngz, dad mbat he haeuj naj gou daeuj, sawqmwh, gou gamjdaengz gwnz naj manhsadsad, hoeng gou lij naeuz:“Daxmeh, gou mbouj miz,gou caen mbouj hawj vunz bang sij, gij cozyez neix caen dwg gou swhgeij sij ha.”

“Baenz lo! Mwngz seizneix hag rox yaeuh vunz lo dwg lwi, ndaej! Gou neix couh dwk dienhvah cam biujgo biujcej mwngz, yawj gyoengqde dwg mbouj dwg bang mwngz sij!”Daxmeh gangj sat couh dawz soujgih hwnjdaeuj, dwk dienhvah hawj biujgo gou.

“Siujveij ha, mwngz dwg mbouj dwg bang dahnuengx sij cozyez ha?”Daxmeh nyaenx gij hujheiq de, “unqswnh” dwk cam biujgo gou.

“Mboujmiz ha.”Daeggo lauxsaed dwk dap naeuz.

“O, yienghneix mboujmiz saeh lo.”Daxmeh gven dienhvah le, youhcaiq dwk hawj dahcej, hoeng dahcej hix naeuz mbouj bang gou sij gvaq. Daxmeh hujdengdeng doiq gou naeuz:“Hw! Gou couh mbouj saenq ra mbouj ndaej cingqgawq! Mwngz caj gou!” Gou mbouj miz saek di banhfap, gag ma ndaw rug, hoemq moeg ndei le, raemxda couh lumj gij naed caw deng mae goenq haenx, doek roengzdaeuj sasa, ciemhciemh dwk gou ninz ndaek lo……

Daxmeh, gou mbouj haemz mwngz gvaq, hix coengzlaiz mbouj ienq mwngz gvaq, hoeng gienh saeh haenx caen gig sieng aen sim gou, hawj gou gig vei, gou siengj, gizsaed miz di saeh, rox lumj golinzgaeq, biu bae biu bae couh rox ra raen diegyouq swhgeij, hoeng miz di saeh couh lumj duzmax ak deng cag lamh, baenzlawz haenqrengz hix duet mbouj ndaej …… Yienghneix sienghaih vunz le baenzlawz hix gouq mbouj dauq lo, couh lumj aen bingz bohliz dwk soiq le, baenzlawz nem hix nem mbouj baenz aen bingz ndei lo……

Daxmeh, mwngz rox lwi?

(haj nienzgaep Vangh Cinghcwngz)