●Daj bi’gvaq daeuj, Yungz- anh Yen roengzrengz doigvangq youq nazhoengq ndaem byaekgwn, baenz liux gai bae Baekging、Sanghaij、Gvangjcouh daengj dieg. Ciuq gyoepsuenq aen yienh neix dajndaem miz gak cungj byaekgwn 20.22 fanh moux, ndaej sou byaekgwn 21 fanh dun, canjciz 33600 fanh maenz.

(Danz Gaijhingh)

●1 nyied 3 hauh, Liujcouh Si Cwngzdouz Gunghswh dawz buek doxgaiq yaufuz、saw daengj dij 3 fanh maenz ndeu soengq daengz Sanhgyangh Dungcuz Swciyen Yangzhih Yangh Mbanjliengzbeiz, hawj hagseng、ranz gungzhoj nem ranz ndaej bangfuz daengj ndaej hag gohgi、 vwnva, sim raeujrubrub.

(Gungh Bujgangh)

●1 nyied 3 hauh, Bingzgvei Gvanjlijgih Minzcunghgiz daengz Daibingz Yauzcuz Yangh vih vunzlai banh hanghmoeg saehsaed. Ciuq cam rox, minzveij baihgwnz gaenq roengz 60 lai fanh maenz guh 4 aen hanghmoeg, guh roen ndaw mbanj. Dangqnaj, aen giz neix cizgiz doihaeuj gak hanghmoeg gensez, ndawde miz 3 aen hanghmoeg gaenq guh sat lo.

(Vangz Ligenh)

●Bi’gvaq, Denhdwngj Yen aeu lai hangh cosih guh ndei hong raemj oij、yinh oij、dok oij, bauj dok oij guh ndaej swnhleih. Daengz 1 nyied 1 hauh, aen yienh neix gaenq dok oij 10.48 fanh dun, ndaej dangz 1.1396 fanh dun, guj bineix 3 nyied guh sat hong dok oij.

(Vangz Lilanz Nungz Youh- veih)

●12 nyied 31 hauh, Liujnanz Gih bangfuz Sanhgyangh Dungcuz Swciyen 150 fanh maenz caeuq doenghyiengh dij 50 fanh maenz. Ciuq cam rox, 2012 nienz daengz 2015 nienz, aen gih neix moix bi bangfuz Sanhgyangh 150 fanh doxhwnj, coengh aen yienh neix Laujbauj Yangh Laujbah、Bwzvwnz、Gizcunh daengj cunh gungzhoj gaijndei gihcuj sezsih、canjyezva fuzbinz、gisuz beizyin.

(Gungh Bujgangh)