Seizdoeng fuengz nit gig youqgaenj, daegbied aeu haeujsim bauj raeuj aenlaeng caeuq fajdin. Doiq bouxlaux、lwgnyez caeuq gij vunz baenz dungx nem cibngeihcijcangz biux naeuh、boux sai simlwed miz bingh daeuj gangj, bauj raeuj aenlaeng daegbied youqgaenj. Bauj raeuj aenlaeng fuengfap gig genjdanh, cijaeu daenj geu buhmbangjmbaek nem ndang ndeu couh ndaej. Ndawbiengz miz coenz vah ndeu naeuz: “Nit daj daejdin daeuj”. Aenvih daejdin liz ndang vunz ceiq gyae, lauz mbang, rengz bauj raeuj yaez. Cunghyih nyinhnaeuz, hezvei daejdin caeuq simdaeuz gvanhaeh maedsaed, danghnaeuz fajdin deng liengz bouxvunz couh yinxhwnj baenz dwgliengz、aek in、hwet naet ga in、mehmbwk dawzsaeg in daengj, ndigah, aeu haeujsim fajdin fuengz nit bauj raeuj cij ndaej. Fuengfap miz: Daenj haiz ndei, gaej daenj daiq lon、daiq ndaet、daiq mbang, mad aeu daenj madbaengzfaiq; bingzseiz aeu lai hozdung cikdin, coi mbangjgiz lwed lae baedauq. Haemhnaengz haeujninz gaxgonq aeu raemxraeuj cimq din, raemxraeuj 50 daengz 60 doh couh ngamj, yienghneix ndaej siu naetnaiq、dingj nit fuengz nit、coi vunz ninz ndaek vaiq.