Dangdaeuhfouh haijdai: Daeuhfouh mbouj liengz mbouj ndat, ndaej ik heiq ciengx lwed. Haijdai ndaej bouj mak ciengx sim、siu ndat leih caep、dingj nit. Haijdai caeuq daeuhfouh caez aeuq gwn, hamz youhciz danbwzciz caeuq gai、diet nem lai cungj veizswnghsu daengj, gak cungj yingzyangj cwngzfwn doxbang doxbouj, ndaej mizyauq dwk fazveih doxbang cozyung.

Danglwedmou ngazduhhenj: Aeu ngazduhhenj caeuq lwedmou gak 250 gwz. Sien cab lwedmou baenz gaiq iq, dwk raemxraeuj swiq seuq bwh yungh. Dwk di youz caeuq coeng、hing、suenq roengz rek cauj ndat le dwk lwedmou caeuq di raemx ndeu. Raemx goenj le dwk ngazduhhenj roengz caiq cawj goenj song faen cung, dwk di byaekrang caeuq di gyu he diuzfeih gwn. Aen dang neix ndaej siu ndat gej doeg、giep fung sanq caep、nyinh bwt bouj lwed, hab bouxlaux baenz haexgaz caeuq boux meh- mbwk baenz lwedhaw gwn.

Gaeqrauh aeuq raetmoguh: Aeu duz gaeqrauh 750 gwz raemj baenz gaiq, raemx fat raetmoguh 750 gwz. Dwk youz roengz rek le dauj nohgaeq roengz fan cauj, caiq dwk coeng、hing、batgak, dwk 3000 hauzswngh raemx, cawj goenj le dwk raetmoguh roengz feiznumq aeuq diemj cung ndeu le gwn. Boux baenz dwgliengz swnh ndat gwn noh caeuq dang, ndaej mizyauq dwk gaijndei ndaeng saek caeuq conghhoz in daengj bingh.

Dang byacaek hing: Aeu duz byacaek 500 gwz, hing caeuq daihcoeng gak 50 gwz. Loq cien byacaek le dwk di raemx he roengz aeuq. Yaek daek hwnj seiz dwk byaekrang caeuq suenqdip, dwk di gyu he couh baenz gwn. Aen dang neix ndaej ik heiq cangq beizheiq、siu ndat gej doeg、sanq caep.