Cingzcik gou lij suenq ndei, gou hix haengj bang vunz, ndigah vunz hix gyaez caeuq gou gyau baengzyoux. Baengzyoux gou gig lai, lumj Liuz Hungzyi、Liuz Veij、Linz Swjwnh、Vuz Fanz、Lai Fanz daengj cungj dwg baengzyoux ndei gou. Baenzlai baengzyoux ndawde, gou ceiq gyaez Lai Fanz, lajneix gou lwnh gij saeh de hawj daihgya dingq ba.

De bineix 12 bi, doeg seiq nienzgaep. De gig gyaez hag doxgaiq, hag sazgwzswh, lij hag Yinghyij dem. De doeg it nienzgaep seiz aenvih cingzcik mbouj ndei, ndigah deng louzgaep, mboujnex seizneix de wnggai doeg haj nienzgaep lo.

De gig hungsang, loq miz di biz, noh miz di ndaem, daep fouq nganxciuq he, 300 doh, ndaeng de miz di hung, hojnaengz dwg siengj mup lai di heiqrang lajbiengz ba. Aen bak de hojnaengz siengj gwn caez gij doxgaiq ndeigwn gwnzbiengj haenx, ndigah bak de haemq gvangq. De doxbuet gig vaiq, youq ndaw hag doxdax ndaej daihngeih mingz, aenvih gen ga de cungj daegbied raez.

Gou caeuq de gig ndei, aenvih de gig rox bauyungz gou.

Miz baez ndeu, gou youq laj laeuz ranz gou bek lanzgiuz. “Bung bung bung……”Lai Fanz hix dawz aen giuz de daeuj bek, yi, dingj gij sing giuz yiengj mbouj doengz ne, laxlawz aen lanzgiuz Laiz Fanz dwg giuz moq. Gou couh heuh Lai Fanz dawz giuz bae gvangjcangz dwk, ndigah dou couh itheij bae gvangjcangz.

Youq gwnz loh, dou doq byaij doq bek giuz, bek dwk bek dwk dou daeuj daengz henz dah. Sawqmwh, gou bek giuz seiz mbouj siujsim, aen giuz sinz roengz dah bae lo. Dai lo, neix cungj dwg gou mbouj ndei, baez neix Lai Fanz haengjdingh gvaiq gou lo. Hoeng siengj mbouj daengz de mbouj gvaiq gou, cijdwg simgip dwk dwk dienhvah hawj bohmeh de, meh de rox le ndatheiq dwk naeuz:“Aen lanz- giuz ngamq cawx couh dwkdoek roengz dah bae, daiq mbouj siujsim lo. Aen giuz neix baenz bak ngeihcaet maenz ne.” Lai Fanz ciep dienhvah le cij iet le iet linx, mbouj gvaiq gou saek coenz. Yawj! De geijlai bauyungz gou ha!

Neix couhdwg hujgeiq iq gou, boux aekgvangq, caeuq gou gig doxndei he.

(seiq nienzgaep Gez Swjhenz)