Ngeihcib bi gvaqbae le, gou ndwn youq dangqnaj aengingq, ndaw gingq dwg dahsau ndang reux gyaeuget he, daenj buh gig seizhwng. Boux haenx couh dwg gou. Gou cingq yaek bae hoh baengzyoux gou Vangz Yizbingz, de dwg mwh gou doeg siujyoz seiz boux baengzyoux ceiq ndei gou, ngoenzneix gya diemqsaw lenzsoj daihcib de yaek hainieb, gou bae bang de cenjcaij. Aenvih gou seizneix dwg ndaw yienh boux lauxsae ceiq okmingz he. Vangz Yizbingz seiz iq couh naeuz hawj gou gvaq naeuz siengj hai haujlai gya diemqsaw, seizneix de caen hai daengz daihcib gya diemqsaw lo, diemqsaw haicieng, baenzlawz naengz mbouj heuh boux lauxsae okmingz bae ne. Ndigah, Vangz Yizbingz ranz ngamq rongh couh dwk dienhvah daeuj, heuh gou bae bang de cenjcaij.

Dajcang ndei le, gou vaiqvet dawz daeh, naengh dendih roengz laeuz, yienzhaeuh bae ranzci hai ci. Hai ci youq gwnz loh, gou itcig siengj: Caeuq Vangz Yizbingz baenzlai bi mbouj raen lo, de wnggai bienqvaq gig hung, mboujnex seizneix lij lumj laeq nyez he, baenzlawz hai ndaej baenzlai aen diemqsaw. Gou yienghneix siengj seiz, gaenq daengz dieg lo.

Gou roengz ci byaij bae diemqsaw, Vangz Yizbingz baez yawjraen gou, couh sikhaek byaij daeuj coh gou. Gou yawjyawj gij yiengh de, couh rox de gaenq mizcienz lo. De daenj ndang buh cingsaenz gvaekgvaek he, daenj buh hau, vaq dwg daenj geu niuzcaijgu he. Mwh iq de daep fouq nganxgingq haenx seizneix bienq fouq hung lo. Vangz Yizbingz ndwn youq dangqnaj gou, lijdwg lumj mwh iq de, sang gvaq gou haj roek lizmij. Dou itheij miz gangj miz riu byaij bae diemqsaw.

Gou fatyienh bakdou diemq- saw gaenq miz haujlai lwgnyez caj youq haenx, simgip dwk caj diemqsaw hai dou, baez cam gou cij rox, ngoenzneix diemqsaw haicieng, daeuj yawj saw lij ndaej gwn gak cungj yinjliu ndwi, ndigah miz haujlai vunz daeuj. Gyoengq nyez cungj simgip dwk caj cenjcaij. Dou baez cenjcaij, gyoengq nyez couh “hum” sing ndeu itheij cung haeuj diemqsaw bae, bae ra gij saw swhgeij gyaez yawj haenx, gyoengq nyez ra ndaej saw le yawj hwnjdaeuj, ndaw diemqsaw yaepyet couh caemdingh roengzdaeuj. Gou caeuq Vangz Yizbingz youq henz gangjsebseb, gou naeuz Vangz Yizbingz:“Mwngz yawj gyoengq- de caen lumj dou mwh iq nei, ndaej yawj saw caen angq!”

Gou caeuq Vangz Yizbingz gangjgoj haujlai nanz, cij fatyienh gaenq haj diemj lai cung lo. Baez neix laux doengzhag doxraen, sawj gou raen daengz gyoengq lwgnyez raen saw le baenzneix vaiqvued, mwh iq doengh gij doxgaiq buenx dou majhung haenx couh dwg saw, bonj saw vaiqvued he! Gvaq ngeihcib bi le dou cungj majhung lo, cungj miz gij swnghhoz swhgeij lo!

(haj nienzgaep Vangz Yingz)