Gou camgya cozvwnz doxdax aeu ndaej ngeih daengjciengj, gou dawz ciengjcang nem hwnj gwnz ciengz bae, gaiq ciengjbaiz ndongqyamyam haenx cuengq ndaw daehsaw. Gak cungj vwnzgi raen le cungj siengj dawz gaiq ciengjbaiz neix, ndigah gyoengqde doxceng hwnjdaeuj.

Soujsien dwg vwnzgi daeggo gangj vah, de daenj geu buh hoengzfwngfwng he, daekeiq fwdfwd dwk naeuz:“Ngoenzneix byawz cungj gaeq caeuq gou ciengj, aenvih gou goenglauz ceiq hung, danghnaeuz mbouj miz gou, yenzbit、 aencetbit、 gyaucat cungj mbouj rox buet daengz gyawz bae lo. Bouxcawj mbouj rox baenzlawz sij cozvwnz ne, ndigah gaiq ciengjbaiz neix wnggai dwg gou dawz.”

Gaiq gyaucat gig gyaez gyaeundei haenx dajcang gyaeugetget dwk naeuz:“Yienghneix gangj hwnjdaeuj, mboujmiz gou mbouj ndaej ne. Yawjyawj gou, vihliux bang bouxcawj gaij loek, guh dwk daengx ndang uqatat. Ndigah gij goenglauz gou beij byawz cungj hung.”

Yenzbit sienseng seizneix hix gangj vah haenq hwnjdaeuj, de ngiengx gyaeuj enj aek dwk naeuz:“Gij goenglauz gou ceiq hung! Danghnaeuz mbouj miz gou, bouxcawj aeu gijmaz sij cozvwnz? Yawjyawj gou, vihliux hawj bouxcawj ndaej sij engq lai engq ndei cozvwnz, gou dinj bae baenz donh ne!”

Seizneix vwnzgi daeggo cap coenz vah he naeuz:“Danghnaeuz mboujmiz gou, mwngz seizneix lij mbouj rox youq gizlawz ne! Hw!”

Aencetbit daegnuengx dingq le gij vah yenzbit, gig mbouj simhai, de vaetheiq dwk naeuz:“Caeuq gou beij, di goenglauz mwngz suenq gijmaz? Yenzbit co le, raek le, mbouj dwg gou dingj aek okdaeuj ma? Gou moix ngoenz vihliux cet yenzbit, haih gou ngoenzngoenz gwn gij cien yenzbit, gou yaek genx hoz dai lo.”

Gij vwnzgi ndaw daehsaw ceng dwk najhoengz rwzdik, byawz hix mbouj fug byawz. Couh youq seizneix, gou dawz ciengjbaiz byaij lo. Aencetbit daegnuengx gip dwk naeuz:“Dwg byawz? Dwg byawz dawz gaiq ciengjbaiz gou byaij lo?” Daehsaw bohlungz naeuz:“Dwg bouxcawj dawz byaij lo, gaiq ciengjbaiz neix wnggai gvi bouxcawj, mbouj wnggai gvi gyoengqsou. Danghnaeuz mbouj dwg bouxcawj haenqrengz gaenxhag, baenzlawz miz gaiq ciengjbaiz neix ne? Sou naeuz dwg lwi?” Gyoengq vwnzgi dingq gij vah daehsaw bohlungz le, cungj najnyaenq dwk ngaem gyaeuj roengzdaeuj. Gyoengqde doengzcaez han naeuz:“Dou rox lo, ngoenzlaeng dou itdingh ndeindei vih bouxcawj guh saeh.”

Daj neix hwnj, gyoengq vanzgi caiq hix mbouj doxceng gvaq lo.

(seiq nienzgaep Liz Hungzginh)