De iugouz linzyezdingh ciuq gij fuengcim Swcigih Dangjveij dingh haenx, daezok gij giva daengx gih 3 bi、5 bi、7 bi cauh ndoeng loegvaq haenx, caemhcaiq caenndang gyoeb- comz hai hoih guh yaenglwnh, dingq gij yigen lauxhangz caeuq gak aen bumwnz haenx, guh ndei coihdingh.

Youq gwnz aen hoih Daengx Gih Hong Ndoengfaex bi 1963 ndwen 10 ndawnyied daengz ndwen 11 co hai haenx, Veiz Gozcingh ciuq gij yigen Swcigih Dangjveij yaenglwnh ndaej haenx, caenh’itbouh guh le aen baijbouh cienzmienh hawj hong ndaem faex cauh ndoeng Guengjsae.

De naeuz: “Ndaem faex cauh ndoeng, baujhoh ndoengfaex, hableix raemj faex, dwg gij saeh laux nangq deng guekgya hwnjguh gingci caeuq mbefat gozminz ginghci haenx. Ndoengfaex mboujdanh caeuq nungz- yez、ndoengfaex、langh doihduz、fusizbinj、dwkbya daengj gak hangz fazcanj gvanhaeh maedciet, caemhcaiq caeuq gwn、daenj、youq、yungh, caeuq gunghyez、gaicawx、gyaudoeng dajyinh、reguek daengj cungj gig miz gvanhaeh. Guengjsae ngaih baenz cairengx, raeuz siengj gaijgez gij haih mbwnrengx neix, dangyienz aeu guh suijli, hoeng daj gaenbonj bae gangj, itdingh aeu daihliengh ndaem faex cauh ndoeng cix ndaej.”

De iugouz gij goengdaeuz dangjcwng gak gaep, ciuq gij gezcwz cunghyangh caeuq swcigih haenx, roengzmaenh gij gienzleih ndoengfaex guekmiz、cizdij miz caeuq seyenz gag miz haenx, veh cingcuj gyaiqbya, hawj daihgya laemxsim bae ndaem faex hoh faex. Gij gaxgonq cawjleix gvaq haenx aeu diemjcaz, gij roengzmaenh mbouj gaeuq haenx aeu boujgoq, gij caengz ndaej roengzmaenh haenx aeu nyinh- caen roengzmaenh. Doengzseiz aeu giethab gij yinhdoeng son’gyauq seveicujyi haenx, leihyungh hai hoih dangj daibyauj、hoih lwgminz daibyauj caeuq gak cungj seizndei, gvangqlangh haeujlaeg dwk doiq ganbu caeuq seyenz guh ndaem feix cauh ndoeng、hoh ndoeng re feiz、mbefat hong ndoengfaex gij son’gyauq neix, daegbied aeu gangj cingcuj hong ndoengfaex caeuq gunghyez、nungz- yez、gozminz ginghci、 vunzlai guh hong gwndaenj miz maz gvanhaeh. Lij aeu haeujsim gaijgez mbangj vwndiz gidij ndaw hong ndaem faex cauh ndoeng、hoh ndoeng re feiz、raemj faex haenx.

(caengz sat)