Mbouj Ndaej Haeujdaeuj

不得进来

Dahyi gipgip muengzmuengz buet daengz lajlaeuz aen bumwnz cwngfuj he, baez yawj soujbiuj, lij ndei, liz roengzban seizgan lij miz ngeihcib faencung, de gyavaiq yamqdin, byaij daengz bakdou samlaeuz Fucujyin bangunghsiz. Aen bangunghsiz neix haemq gvangq, ndawde cij miz aen daizbangungh ndeu, boux mehmbwk cungnienz he naengh youq gizhaenx.

“Mwngz ndei!” Dahyi doq gangj doq yaek yamq haeuj dou bae.“Mboujndaej haeujdaeuj”. Sawq- mwh, dingqyi mehmbwk daihsing hemq coenz ndeu. Dahyi lumj bungqdienh nei gipmuengz suk din dauqlaeng, youh vueng youh geizheih, yawjyawj ndaw ban- gunghsiz, mbouj raen miz maz saeh mbouj ndaej yawj, Dahyi cingq geizheih, mehmbwk haenx hwnqndang yiengq bakdou byaij daeuj, doq byaij doq naeuz: Gou ngamq vuet dibanj, caengz hawq ne.

Dahyi dingq le, soeng gaemz- heiq ndeu, de yawjyawj dibanj, daej mboujdwg, riu mboujdwg.

Couh yienghneix, Dahyi ndwn youq baihrog bakdou, cazcam gij saeh de siengj cam haenx. Mehmbwk haenx ndwn youq baihndaw bakdou hoizdap.

Bang Sij Faenzcieng

代写文章

“Dingling, dingling”, soujgih yiengj lo, Dahyi baez ciep, naeuz: “Mwngz ndei ha, mwngz dwg byawz ne?”

“Mwngz dwg Dahyi lwi?”

“Dwg ha, mwngz dwg byawz?”

“Gou dwg XXX Cazcise, geiq ndaej mwngz douzgauj hawj dou gvaq, dwg lwi?”

“Dwg ha, dwg mbouj dwg faenzcieng gou miz maz sij mbouj deng ne?”

“Faenzcieng mbouj miz saeh, mwngz miz lunvwnz lwi?”

“O，bingzseiz gou cij sij di saeh fatseng youq henz ndang gou haenx, soqlaiz mbouj sij lunvwnz, hix mbouj rox sij.”

“Mwngz siengj sij lwi?”

“A!?”

“Danghnaeuz mwngz siengj sij, gou bang mwngz sij.”

“A……Miz cungj saeh neix ha? Sij, sij bien ndeu aeu geijlai ngaenz?”

“Mwngz yaek fatbiuj lwi?”

“Dangyienz aeu fatbiuj ha!”

“Song cien cihsaw baedauq aeu 3000 maenz, cij sij mbouj fatbiuj aeu 2000 maenz.”

“O! Haemq bengz bw!”

“Mwngz yaek bingz cizcwngh gaepcung roxnaeuz gaepgau?”

“Gou dwg bouxgunghyinz he, cij dingqgangj bingz senhcin bw.”

“O, gauxca mwngz lo.”Cij dingqnyi “gaep” sing ndeu, dienhvah goenq lo.

Ngaenzbouj Gyadienh Roengz Mbanj

家电下乡补助款

“Dingling”, soujgih yiengj lo, Dahyi baez ciep, naeuz:“Mwngz ndei!”

“Mwngz ndei! Mwngz dwg Dahyi lwi?”

“Dwg ha, mwngz dwg byawz?”

“Gou dwg caizcwnggiz. Mboengqgonq mwngz cawx aen cimozdoz ndeu, haumaj dwg XXXX ba?”

“Dwg ha, miz maz saeh ne?”

“Gou dwg boux banhleix ngaenzbouj gyadienh roengz mbanj, cingj mwngz vaiq di daeuj banhleix soujsuz ha.”

“A……Mbouj dwg hoh nungz- yez hix ndaej yiengjsouh aen cwngcwz neix ha?”

“Dwg vei, guek raeuz moix bi cungj hawj di cijbyauh hawj hoh feihnungzyez, aen hauhci mwngz seizheiq ndei, ndaej yiengjsouh ngaenzbouj lo, mwngz aeu vaiq di daeuj banhleix, hamjbi couh mbouj miz yungh lo.”

“Ndei, gou caenhliengh vaiq bae banhleix.”

“Seizneix gaenq gyawj byaibi, gak aen danhvei gak aen bumwnz cungj nyaengq, danghnaeuz mwngz mbouj ndaej hoengq daeuj banhleix, couh naeuz ngaenzhangz canghau hawj gyoengqdou nyi, gou daj ngaenz roengzbae hawj mwngz.”

“Ndei lai lo, dauqlaeng gou caiq hawj canghau hawj mwngz.”

Gvaqlaeng, Dahyi dwk dienhvah bae minzcwnggiz cazcam, gaenbonj mbouj miz cungj saeh neix. Gvaq le song ngoenz, youh miz vunz dwk dienhvah hawj Dahyi, cam de aeu ngaenzhangz canghau, Dahyi gyaj- cang doeksaetyat naeuz:“Gaenq banh ndei lo, ngaenz hix daengz fwngz, mwngz mbouj rox ha?”

“Du……du……”, dienhvah baihde goenq lo.