Haeuj daengz seizdoeng, haethaemh vwnhdu doxca daih, nyeznomj yungzheih baenz dwgliengz caeuq conghhoz mbouj cwxcaih, ndigah, gij gwn、daenj、youq、byaij nyeznomj bohmeh aeu lai haeujsim cij ndaej.

1、Daenj: Aenvih vwnhdu doxca haemq daih, haethaemh aeu hawj nyeznomj lai gya daenj geu buh ndeu. Gij nyeznomj aenvih haengj doengh, ndang yungzheih ok hanh haenx, mwh de guhcaemz seiz aeu youq raeblaeng de demh mbaw gaen ndeu roxnaeuz mwh de guhcaemz sat le gibseiz vuenh buh hawj de. Doengzseiz, haiz nyeznomj wng hawj de daenj yindunghaiz mbaeumbengq guhcawj, gaej hawj de daenj haiznaeng.

2、Gwn: Lai hawj de gwn di doxgaiq hamz veizswnghsu lai haenx. Daegbied dwg gij doxgaiq hamz veizswnghsu A caeuq veizswnghsu C lai haenx, gij doxgaiq neix ndaej bangcoh yawhfuengz sanghuhgizdau ganjyenj. Gyaeujsuenq、lauxbaeg、hing、byaekgep cungj dwg gijgwn demgya nyeznomj rengz dingj bingh, hoeng gojnwngz nyeznomj mbouj haengj gwn, cawjranz ndaej doenggvaq gaijbienq gwn yungh fuengfap yaeuh nyeznomj gwn. Lumjbaenz mwh cauj byaek seiz gya dwk di suenq soiq ndeu, bingzseiz cawj di raemx lauxbaeg、raemxhing hawj de gwn. Gij nyeznomj ciengz youq seizdoeng ae’gebgeb haenx, cawjranz aeu aeuq di raemx makleiz dangznae hawj de gwn. Linghvaih, danhfanz dwg yw cungj miz sam faen doeg, gaej hawj nyeznomj dawz gwn yw dangguh diuz roenloh yawhfuengz baenzbingh daeuj gwn.

3、Youq: Yienznaeuz mbwn nit, hoeng, ndaw ranz lij aeu baujcwng itdingh seizgan daeuj hai cueng doeng rumz, baujciz ndaw rug hoengheiq riuzdoeng ndei. Moegdenz nyeznomj aeu ciengzseiz gaenx saeg dak ndit.

4、Byaij: Seizdoeng ceiq hab bae rog ranz yindung, cawjranz ndaejhoengq seiz wng lai daiq nyeznomj okbae yindung, lai hawj de dak ndit, dak ndit ndaej coicaenh aenndang nyeznomj supsou gai, doengzseiz hix ndaej demgiengz dijciz nyeznomj.