Bouxlaux ciengz gangj: Doeng gwn lauxbaeg hah gwn hing. Gizsaed, hing hix dwg gijgwn ndaw swnghhoz seizdoeng ciengx ndang siuj mbouj ndaej ndawde cungj ndeu. Cunghyih nyinhnaeuz, hing ndaej raeuj ndaw dingz rueg、gaij biuj sanq caep. Yienhdaih yozlij yenzgiu nyinhnaeuz, ndaw hing hix miz gij huq gaj nengz doenghgo, gij gaj nengz cozyung de mbouj beij coeng caeuq suenq yaez. Gij manh ndaw hing ndaej gig raemxdungx iemqok, caemh ndaej coi siuvaq; ndawde hamz veihfazyouz haemq lai, ndaej hanhhaed ndang vunz supsou danjgucunz, fuengz daep caeuq lwed romcwk danjgucunz.

Seizdoeng haetcaeux habdangq gwn di hing ndeu, ndaej gyoepsanq nitgyoet, yawhfuengz dwgliengz. Haeuj daengz gyanghaemh, heiqyiengz ndang vunz sousuk, heiqyaem hainduj hoengh- vuengh, ndigah, wng lai gwn di gijgwn cing ndat siu heiq siu gwn ndeu, yienghneix mizleih gyanghwnz yietnaiq, lumj lauxbaeg daengj.

Gyanghaet gwn hing miz haujlai fuengsik, ndaej cawj dang gwn, hix ndaej dwk begdangz iep gwn roxnaeuz dwk roengz byaek cauj gwn.

Daih’it, gyanghaet hwnqdaeuj hamz hing gep: Haetnaengz hwnqmbonq le, sien gwn boi raemxgoenj ndeu, doeklaeng gvet naeng hing ronq baenz gep mbang, cuengq 4 daengz 5 gep roengz raemxgoenj bae log yaep ndeu le dwk haeuj bak bae hamz 10 daengz 30 faen cung caiq menhmenh nyaij gwn menhmenh ndwnj. Ciengzseiz genhciz, ndaej yawhfuengz baenz dwgliengz.

Daihngeih, gwn dang makcauj hing: Haetnaengz aeu 10 aen makcauj、5 gep hingndip, di dangznding ndeu, baek raemx dang caz gwn, ngoenz baez, daegbied hab boux seizdoeng din fwngz gyoet gwn. Aeu gangjmingz dwg, hing dwg loq raeuj, gwn daiq lai rox sieng yaem hoengh yiengz, boux yaem haw huj hoengh mbouj hab gwn lai.

Daegbied daezsingj dwg, ciengeiz gaej gwn hing naeuh, gwn de rox yaeuhfat daep baenz aiz caeuq saihoz baenz aiz.