Sou rox lwi? Lwgda dwg conghcueng aensim, mboujmiz lwgda, swnghhoz couh gig gannanz, gangj daengz neix, couh siengj daengz bouxmengz, deng lo, ngoenzneix lauxsae couh heuh dou goemq da mo mengz guh saeh.

Sien dwg gou byaij gvaq gwnz song aen daengq bae, caiq heux aencongz daengj youq baihlaeng haenx byaij hob he, doxdauq seiz caiq heux aendaengq byaij hob he, gaej naeuz neix heih guh bw, gizsaed guh seiz lij aeu goemq lwgda.

Hainduj, gou bang vunz goemq da seiz goemq ndaetndaet bae, mbouj hawj gyoengqde yawjraen saek di. Hoeng doeklaeng daengz gou le, couh daengz vunz daeuj goemq lwgda gou, gou faen mbouj cingcuj mbiengj lawz mbiengj de, daengxcungq laepcupcup.

Gou ciep ndaej minghlingh le, couh ganjgaenj byaij, sawqmwh, aen doxgaiq he dangj youq dangqnaj gou, gou naemj, haenx dwg diuz giuz he ba!

Baeznduj, gou ngamq mbiengj ga he yamq hwnjbae couh doek roengz- daeuj lo, gou aeu fwngz bongxbongx bakaek, laebdaeb guh, baez daihngeih, gou hwnjbae lo, cingq yaek byaij seiz ndwn mbouj maenh, youh doek roengzdaeuj lo, baenzlawz guh? Gou ndaw sim youh gaenj youh gikheiq, caen siengj beng mbaw hungzlingjginh roengzdaeuj. Doeklaeng, gou yamqdin naekgywggywg byaij gvaq diuz “giuz” ceiq nanz byaij haenx lo, caen mbouj yungzheih ha!

Gou baez di baez di nod baenaj, aendaengq miz di honz, caemhcaiq yied honz yied lai, seizneix gou caen dingqnyi simdaeuz diuq dungdung- dung. Doxbae mbouj ndaej, doxdauq hix mbouj ndaej, gou wnggai baenzlawz guh ne? Seizneix, faj fwngz raeujrub he ndenq coh gou, gou gaenjgaenj dwk vaxdawz fajfwngz neix, couh lumj vaz ndaej diuz cag gaeuqmingh he, mbouj gamj cuengqsoeng. Yienghneix soemx- soemx saxsax byaij gvaq giuz lo. Danghnaeuz bouxmengz mbouj miz fajfwngz raeujrub neix bangcoh de, de dwg geijlai gannanz ha, saekmwh lij rox laemx dem.

Gou laebdaeb mo laep byaij, mo daengz gaiq doxgaiq ndongjndatndat he, haenx wnggai dwg aendaiz lo, gou heux de hob he, dauqma seiz, gou caen mbouj rox daj mbiengj lawz dauq, sawqmwh youh miz faj fwngz he rag gou gvaqbae, youhcaiq bang gou baez he.

Cungjsuenq ndaej guh sat gienh saeh neix lo, gou vaiqvet rag mbaw hungzlingjginh roengzdaeuj. Ndawsim nyaenx mbouj ndaej boiqfug boux- mengz, gyoengqde guh gij saeh haenx, couhcinj dwg gwnhaeux byaijroen gij saeh dou yawj hwnjdaeuj gig genjdanh neix, hix dwg gyoengqde sai haujlai rengz cij guh ndaej daengz, yiengh- neix, gyoengqdou gyoengqboux da- ndongq neix miz maz lijyouz mbouj ndeindei henhoh lwgda dou ne?

(seiq nienzgaep Fan Singhyij)