Gou miz aen sibgvenq vaih ndeu, haenx couhdwg rox“it sim song yungh”, ngoenznaengz guh gyahdingz cozyez seiz cungj maij naengh youq dangqnaj densigih, mienh yawj densi mienh guh cozyez. Hix cingq dwg aenvih yienghneix, gij cizlieng cozyez gou soqlaiz mbouj ndei gvaq, sij cih mbeuj bae mbeuj dauq, guh ndaej deng hix noix.

Ngoenzneix cuengqhag ma ranz, gou youh ciuqyiengh hai densi cunjbei guh cozyez, daxboh byaij haeujdaeuj riu dwk doiq gou naeuz:“Siujyangz, songraeuz guhcaemz baez ndeu ba.”

“Guhcaemz? Ndei lai lo!”Gou angq dwk diuq hwnjdaeuj.

Daxboh aeu song mbaw ceijhau caeuq song gonj caijbit ma, sien veh aen gienluenz he hwnj fwngzswix gou bae, caiq veh aen cingfanghhingz he hwnj fwngzgvaz gou bae. Hai, gou laihnaeuz dwg gijmaz nei, daiq genjdanh lo, sam miux cung veh ndei aen gienluenz ndeu, haj miux cung veh ndei aen cingfanghhingz ndeu.

“Yo, caen veh ndaej vaiq ha.”

“Dangyienz lo!”

Daxboh ciepdwk naeuz:“Mwngz gaej angq caeux lai, seizneix caencingq nanzdoh daeuj lo, mwngz fwngzswix fwngzgvaz gak gaem gonj bit ndeu, lumj haxbaenh nei veh aen gienluenz hwnj fwngzswix bae, veh aen cingfanghhingz he hwnj fwngzgvaz bae, mboujgvaq, aeu doengzseiz veh cijndaej bw.”

“Ndaej, mboujmiz vwndiz.”

Gou siengj:“Daiq genjdanh lo, song fwngz doengzseiz veh, itdingh mbouj mauhgvaq haj miux cung.”

Hoeng, hawj gou siengj mbouj daengz dwg, gou siengj veh gienluenz hwnj fwngzswix, daengzlaeng fwngz- gvaz hix gaenriengz veh luenz, siengj veh cingfanghhingz hwnj fwngzgvaz, fwngzswix hix gaenriengz veh cingfanghhingz. Sam faen cung gvaqbae lo, song cik fwngz veh ok gij doz haenx luenz mbouj luenz, fueng mbouj fueng.

Daxboh lumhlumh gyaeuj gou naeuz:“Siujyangz, mwngz rox lwi? Vihmaz haxbaenh mwngz ngamq veh luenz seiz caeuq ngamq veh fueng seiz cungj veh ndaej vaiq, doengzseiz yungh song cik fwngz dajveh seiz couh gig menh, caemhcaiq veh mbouj baenz yiengh?”

Gou ngauz le ngauz gyaeuj.

“Haenx dwg aenvih guh maz saeh cungj mbouj ndaej it sim song yungh! Raeuz guh maz saeh, cungj aeu ciensim cijndaej, cijmiz baenzneix, cijnaengz guh baenz saeh ha!”

Dingq daxboh baenzneix gangj, gou singjsak haujlai lo. Baenzneix, gou gven densi bae, ciensim daeuj guh cozyez lo.

(Siuh Hoyangz)