Gizneix dwg ndaengfaex hung gyaeundei ndeu, youq gyae yawj bae, cijraen baenz goengq baenz goengq byasang daengjvidvid, couh lumj baenz fag baenz fag giemq youh soem youh raeh, cap haeuj mbwn bae. Gwnz dingj de, dwg aenmbwn seuqcingh lumj aeu raemx swiq gvaq, gwnzmbwn miz haujlai fwj haubieg haubieg, rumz baez ci, couh bienq baenz gak cungj gak yiengh doxgaiq, couh lumj goengrumz guh mohsuzswh cingq bienq mohsuz nei!

Youq ndaw ndoeng neix, miz diuz dah raemx cebyauyau he. Ndaw dah miz haujlai bya’iq dwggyaez. Miz di daj ndaw raemx diuq hwnjdaeuj, cazyawj miz mbouj miz vunzdig; miz di daengxyouq yawj seiqlengq, yawj gizlawz miz doxgaiq baenz gwn; lij miz geij duz heuz gig vaiq, haenqrengz cung baenaj, yaepda couh mbouj raen ngaeuz lo, lumjbaenz cingq doxdax yawj byawz heuz ndaej ceiq vaiq.

Youq henz diuzdah sawliklik neix, miz dieg nywj loegyauyau he, gwnzde miz haujlai va hai dwk, saek henj saek nding, gyaeundei dangqmaz. Geij duz douqlwg bwn haumbapmbap haenx yawjraen le, angq dangqmaz, youq gwnz diegnywj guh’angq riu sing iq sing hung, couh lumj aen giuznae nei, youq gwnz haenx ringx bae ringx dauq, dwggyaez lai lo.

Lienghvaih mbiengj dah haenx, ndoengfaex mwncupcup. Duz roegvenz gyaeundei ndeu mbin daengz gwnz go faex hung mwncupcup he, yungh gij sing ceiq seksak haenx ciengqgo. Gij sing geizmiuh neix cienz daengz seiq fueng bet baih. Ndaw ndoengfaex gyoengq doenghduz cungj rox lo, roegdingfaex、roegvameiz、roeggeuq、roegraeu、roegdinghgeng、roeggap、roegenq、roeglaej、roegfek……cungj dingq- nyi sing go lo, hix siengj daeuj ciengqgo, ndigah couh itheij comz daeuj, mbin daengz gwnz faex, hainduj daihhabciengq, gij sing haenx gingdoengh daengx aen ndoengfaex, moix duz doenghduz cungj deng gij go daihhabciengq neix maez lo, gij sing haenx beij gwnzbiengz cungj yozgi lawz cungj ndeidingq.

Ndoengfaex neix caen gyaeu- ndei ha! Mwngz siengj mbouj siengj daeuj gizneix ne?

(seiq nienzgaep Cangh Yinciz)