Gaenh bi daeuj, Lingzyinz Yen Yihungz Yauzcuz Yangh Yibauj Cunh dangjcihbu suhgi Siuh Cinz, doenggvaq coengh ok geiqmaeuz、 gisuz、 cienz- ngaenz nem coengh hong, daiq ok bang vunz baenzfouq naengzlig ak haenx. Youz gyoengqde sonyinx, Yihungz Yauzcuz Yangh 18 aen cunh hwng comz hwnjdaeuj, doxcoengh doxbang, doengzcaez baenzfouq.

Daj 1995 nienz daeuj, Siuh Cinz doenggvaq doq hag doq yungh, baenz le Lingzyinz Yen“bouxdaeuz baengh gohgi baenzfouq”. Dangqnaj, de miz 2 aen gihdi dajndaem gak cungj lwgmak mizmingz youh maenhndei haenx, menciz gungh 350 lai moux, bi canh ngaenz gyawj 40 lai fanh maenz.

Dangguh boux dangjyenz he, Siuh Cinz nyinhnaeuz de yaek mizsim roengzrengz hawj vunzlai bienq fouqmiz. Vihneix, de ngamq ndaej baenzfouq le, couh youq ndaw ranz banh le“hagdangz nungzgyah”, bangcoengh doenghboux gungzhoj fazcanj swnghcanj, anbaiz gij ranz gungzhoj riengz guh suenmak swhgeij, hawj haujlai bouxgungzhoj bienq fouqmiz.“Geij bi neix, danghnaeuz mbouj miz Vangz cihsuh bangcoengh, gou couh dang mbouj ndaej aen gya neix lo!”Yihungz Yauzcuz Yangh Yibauj Cunh Yilij It Cuj boux vunzmbanj Siuh Baujcunz gamjcingz naekgywd dwk naeuz.

“Boux he fouq daengx mbanj hoj, couhdwg swhgeij mbouj fouq; mwngz miz、gou miz、caezgya caemh miz, neix cij dwg gij muzdi raeuz aeu haenx.” Youq seiz caijfangj, Siuh Cinz yienghneix naeuz.

(Vangz Yenzyungz)