Bonjbauq siusik (gicej Dangz Lungz Yenj Gijcih Liengz Haij- singh) 12 nyied 13 hauh banhaet, Daengx Guek Yinzda daibyauj、Swcigih Minzveij、Minzyijveij cujyin Luz Yenbenj caiq bae Cingsih Yen diuyenz baenzlawz laeb“daengx gih minzcuz doxgiet cinbu sifanyen”nem gij cingzgvang gvangjbo densi Vahcuengh, haeujlaeg bae cam rox aen yienh neix youq guh hong gvangjbo yingjsi Vahcuengh ndawde gij guhfap moq、cingzcik moq、hojnanz moq nem dajsuenq moq, liuxle giengzdiuh naeuz gvangjbo yingjsi Vahcuengh dwg minzcuz doxgiet cinbu sifanyen gensez ndawde hangh neiyungz cungyau he, muengh Cingsih gyarengz guhhong, hawj daengx yienh ginzcung naemjfap doxlumj, caemh- caiq gyoepcomz geiqmaeuz vunzlai, comz gij rengz minzcuz、gvangjden daengj gak diuz cansen, banh ndei gvangjbo yingjsi Vahcuengh.

Luz Yenbenj naeuz, dangqnaj Cingsih Yen densi Vahcuengh gaenq miz di binjbaiz nem sifan yauying, comz le gingniemh ndei hawj daengx gih doigvangq. Dangqnaj Swcigih Minzveij、 Swcigih Dangjveij Cujcizbu、Dungjcanbu cingq lienzhab youq gih raeuz senj sam giz guh minzcuz doxgiet sifanyen, Cingsih dwg giz ndeu. Yienghneix le, Cingsih Yen wnggai aeu laeb minzcuz doxgiet cinbu sifanyen guh fuengyiengq, dawz gvangjbo densi Vahcuengh dangguh minzcuz doxgiet sifanyen gensez ndawde gij neiyungz cungyau de, lienzhab gak bumwnz dawz gvangjbo densi Vahcuengh dajcauh baenz gih raeuz roxnaeuz daengx guek aen minzcuz yingjsi cezmuz binjbaiz ndeu.

Luz Yenbenj lij gangj baenzlawz doigvangq densi Vahcuengh gij“Cingsih mozsi”de：Swcigih Minzveij Vangj、Gvangjsih Minzcuz Bau Vangj dwg dangqnaj gih raeuz aen cueng cungyau senhconz hong minzcuz、hong vah saw minzcuz haenx, vunz diemj yawj lai, Cingsih Vahcuengh densi cezmuz mizdi neiyungz ciep daengz gij vangjcan neix, doenggvaq aen bingzdaiz neix, yinx vunz daeuj yawj Vahcuengh densi cezmuz engq lai.