Haeuxcuk yungzheih deng ndang vunz siuvaq supsou, mbouj sieng dungxsaej, youh ndaej bouj ndang. Haet seizdoeng gwn vanj cuk ndatfwd ndeu, gawq ndaej gej dungx iek, youh ndaej yw bingh. Lajneix gaisau caet meih cukbaujgen seizdoeng hawj daihgya:

1、Cuk makcauj nding: Aeu 10 daengz 15 aen makcauj nding caeuq 100 gwz haeuxsuen caez cawj cuk gwn. Cungj cuk neix rang diemz habbak, ndaej yw ndang nyieg、bingh ndei ndang haw、heiq lwed song sied、yingzyangj mbouj ndei、dungx hawnyieg、lwedhaw daengj bingh, youh ndaej baujhoh aen’daep dem.

2、Cuk raetmoegngaex: Aeu raetmoegngaex hau 10 gwz (roxnaeuz raetmoegngaex ndaem 30 gwz) cimq raemx byongh ngoenz. 100 gwz haeuxsuen, 3 daengz 5 aen makcauj nding cawj goenj le dwk raetmoeg- ngaex roengz doengzcaez cawj cug, dwk di dangznae ndeu gwn. Cuk raetmoegngaex ndaej nyinh bwt seng raemx、ik heiq dingz lwed、cangq uk giengz sim.

3、Cuk ceh gaeujgij: Aeu 50 gwz ceh gaeujgij, 100 gwz haeuxsuen caez cawj cuk gwn. Cungj cuk neix ndaej nyinh bouj daep mak、nyinh bwt dingz ae、raeh da, daegbied hab bouxlaux gwn. Cuk cehgaeujgij hoh daep hix haemq mingzyienj.

4、Cuk noh makhuzdauz: Aeu 50 gwz ngveih makhuzdauz, 100 gwz haeuxsuen caez cawj cuk gwn. Noh makhuzdauz ndaej ik mak bouj uk、dingz ae caeuq dingz ae’ngab, ciengzseiz gwn ndaej fuengz bingh’ae- ngab fukfat.

5、Cuk noh maknganx: Aeu 30 gwz noh maknganx, 100 gwz haeuxsuen caez cawj cuk gwn. Cungj cuk neix ndaej daih bouj heiq lwed、ciengx heiq an saenz, dwg cungj huqbouj seizdoeng ceiq ndei ndeu.

6、Cuk nohma: Aeu 250 gwz nohma, 450 gwz haeuxsuen, di hing ndeu. Swiq nohma seuq ronq baenz gaiq iq, caeuq haeuxsuen、hing caez cawj cuk baen song baez gwn. Doiq boux nienzlaux ndang nyieg、boux heiqyiengz mbouj gaeuq、boux rih cing laeuh cing、boux yangzveij、boux yingzyangj mbouj ndei、boux seiq gen ga gyoet lau nit miz nyinh bouj caeuq ceihyw cozyung.

7、Cuk nohyiengz: Aeu 500 gwz nohyiengz, 15 gwz vangzgiz, 15 gwz yinzsinh, 15 gwz fuzlingz hau, 3 aen makcauj, di haeuxsuen ndeu, caez cawj cuk gwn, ndaej yw yienzheiq mbouj gaeuq、heiq lwed song haw、hwet naet ga unq、dungx hawnyieg daengj bingh, hix ndaej ik heiq bouj haw、raeuj dungx raeuj din、bouj lwed nyangq nyinz、sek dungx.