Seizdoeng byaek siuj, binjcung dandiuh, ciengz dwg gvaq aen seizdoeng ndeu le, ndang vunz veizswnghsu mbouj gaeuq, lumj siuj veizswnghsu C seiz, ndaej yinxhwnj bouxlaux baenz conghbak biux naeuh、goekheuj gawh in、ok lwed、haexgaz daengj binghyiengh.

Seizdoeng mbwn nit, yaem hoengh yiengz nyieg. Ndang vunz deng nit yingjyangj le sengleix goengnaengz aenndang caeuq gwnndoet cungj fatseng bienqvaq lo. Ndigah, hableix diuzcingj gwnndoet, baujcwng ndang vunz supsou yingzyangj gaeuq, doiq daezsang bouxlaux rengz dingj nit caeuq siuj baenz bingh, vaiqvued ancienz gvaq doeng gig youqgaenj.

Yingzyangj seizdoeng aeu dem ndat guhcawj, ndaej habdangq gwn di gijgwn hamz dansuij vahozvuz caeuq youzlauz ndeu. Doiq bouxlaux daeuj gangj, gaej gwn youzlauz daiq lai, danhseih danbwzciz aeu lai, itbuen ciemq cungjyezlieng 15% daengz 17% couh ngamj. Danbwzciz wng gwn youhciz danbwzciz guhcawj, lumj nohcing、 gyaeqgaeq、nohbya、cij、duh caeuq gij doxgaiq aeu duh guh haenx, gij doxgaiq neix yungzheih deng ndang vunz supsou, hamz miz anhgihsonh ndang vunz aeu miz haenx, yingzyangj gyaciz sang, ndaej hawj ndang vunz lai dingj ndaej nit caeuq dingj ndaej bingh.

Seizdoeng byaekheu siuj, ndaej habdangq gwn di lwgmaenz、maenz- doengzlingz daengj. Gij maenz neix mboujdanh ndaej bouj veizswnghsu, lij ndaej cing ndaw ndat、gej doeg dem. Linghvaih, seizdoeng cawz gwn byaekhau le, lij ndaej gwn lauxbaeg hau、lauxbaeg nding、ngaz duhhenj、ngaz duhheu、byaekyouzcai daengj, gij byaek neix hamz veizswnghsu haemq lai. Cijaeu ciengzseiz vuenh binjcungj, hableix dapboiq, ndang vunz caemh mbouj siuj veizswnghsu. Bouxlaux aenvih siuvaq supsou caeuq ndaw ndang baizok yinhsu yingjyangj, ndaw ndang ciengz dwg siuj gyaz、gai、naz、 diet daengj yenzsu, caiq gyahwnj seizdoeng ok nyouh lai, ndaej habdangq gwn di nyauh iq、byuk nyauh、 ciengqlwgraz、daepmou、gyoijhom daengj. Danghnaeuz bouxvunz ndang siuj naz, mwh cauj byaek seiz dwk gyu hamz di couh ndaej.