Seizdoeng, youq ndaw fuengz vwnhdu haemq sang haenx caemxndang seiz, aenvih naengh ndaw bat raemxndat cimq daiq nanz, gojnwngz rox raemhrwnh okyienh gyaeuj ngunh、da raiz、rub myaiz、rueg ok、hanh lae hanh roenx daengj yienghsiengq, youqgaenj seiz rox ngunh laemx youq ndaw bat raemxndat, daegbied dwg bouxlaux ndang nyieg engq yungzheih fatseng cungj yienhsiengq neix. Vih baujcwng ancienz, bouxlaux seizdoeng caemxndang wng haeujsim baihlaj geij diemj:

It、Baez fatseng caemxndang gyaeuj ngunh, wng vaiqdi byaij ok rog fuengz daeuj, danghnaeuz swhgeij byaij mbouj ndaej, vunz ndaw ranz ndaej bang fuz de roxnaeuz ram de okdaeuj, hawj de ninzdaengjai youq giz doeng rumz ndei haenx, gwnzndang de aeu haeujsim bauj raeuj, fuengz de baenz dwgliengz.

Ngeih、Gibseiz hawj de gwn di raemxdangz ndat roxnaeuz raemxhing ndat ndeu, itbuen cingzgvang lajde, mbouj geij nanz de gag rox hoizfuk dauq ndei.

Sam、Ginggvaq baihgwnz cawqleix lij caengz raen ndei, caemhcaiq rueg ok、cingsaenz mbouj ndei roxnaeuz aek mwnh aek in seiz, vunz ndaw ranz wng gibseiz soengq bae yihyen duenq yw.

Seiq、Seizdoeng caemxndang(daegbied dwg naengh ndaw bat dajcaemx) raemx mbouj hab ndat lai, gamhanh youq 32 daengz 35 doh dauqndaw couh ngamj. Mbouj hab cimq aenndang youq ndaw raemxndat daiq nanz, ndaw fuengz hix gaej maedfung daiq ndaet, aeu miz giz doeng rumz.

Haj、Boux baenz hezyaz sang、boux baenz gvanhsinhbing、boux sim bwt miz bingh ceiq ndei dwg rwed caemx.

Roek、Bouxlaux ndang nyieg youq ndaw fuengz caemxndang seiz, caencik wng seiz mbouj seiz heuh de han dap, yienghneix ndaej fuengz de oksaeh, caemh ndaej gibseiz bae cawqleix.

Caet、Ranzdajcaemx ndaw fuengz aeu vih bouxlaux an miz giz fwngz gaem, ndaw bat ndaej cuengq gaiq gyauhden fuengz gvad ndeu, fuengz bouxlaux laemx sieng.