Ndaem Goho

9 nyied 29 hauh singhgiz roek rengx

Haet neix, gou ndaem le 9 go ho.

Gyaeujho luenzlulu, geij beixnuengx itheij doxgot dwk ndaetndaet bae, caen doxgiet bw. Gyoengqde lij doengzcaez daenj geij caengz byuknaeng mbangmbetmbet、haubiegbieg dem.

Gou mbouj gaenj mbouj menh duet gij byuknaeng geij beixnuengx nei okdaeuj, lij naeuz gyoengqde:“Sou miz maz vah vaiqdi doxlwnh bw, sou gangj sat gou couh yaek faenhai sou, mbouj cinj daej bw!” Gvaq le yaep ndeu, gou sai haujlai rengz cij mbek ndaej gyoengqde, yawj daeuj, gyaeujho geij beixnuengx caen dwg doxndiep doxnem ha.

Gou aeu aen bat he cang namh, dawz 5 dip ho cap roengz namh bae, lij saj caengz namh mienz he cw dem, caiq rwed di raemx, linghvaih 4 dip, gou cuengq gyoengqde roengz aen dieb iq seuqset miz raemx he bae, youq henz humx di rinlaiq, baez yawj, caen gyaeundei.

Yaek ninz seiz, gou nam naeuz:“Gyaeujho ha gyaeujho, mwngz aeu cengheiq bw, vaiq di maj hung!”

Gyaeujho Did Ngaz Lo

10 nyied 2 hauh singhgiz sam rengx

Haet neix, gou bae yangzdaiz baez yawj, va, gou fatyienh miz sengmingh moq lo!

Gij gyaeujho ndaem youq ndaw bat haenx gaenq did ngaz lo, gwnz dingjsoem dip ho gaenq did geu ngaz loegyeuyeu he, gij sengmingh neix gyaeuj con okdaeuj, geizheih dwk yawj aen biengz moqyat neix.

Gij gyaeujho ndaw dieb cij miz dip he conh di di loegyeu, gou siujsim yebyeb dawz dip he hwnjdaeuj yawj, goek de maj gij rag lailai bae, couh lumj gij mumh raez daxgoeng! Gyoengqsou yaek gwn lai di yingzyangj, vaiq di did ngaz maj hungz ha!

Goho Maj Mbaw Lo

10 nyied 5 hauh singhgiz haj rengx

Youh gvaq 3 ngoenz, goho gou maj caen vaiq ha!

Yawj, gij gyaeujho ndaem youq ndaw bat haenx maj mbaw lo. Gij yiengh de miz di maj baenz cih Y, miz di maj baenz cih V, lij miz di maj baenz cih I. Gij mbaw mbaw raez miz 20 lai lizmij, mbaw dinj miz 10 lai lizmij. Mbawho raezredred, mbangmbimbi, loegsien loegsien, gig dwggyaez.

Gij ho ndaw dieb maj haemq menh, cijmiz geij mbaw dinjdedded.

Mbawho ndaej guh byaekhom, daxmeh cauj byaek seiz, dawz mbawho ronq saeqsaeq bae, saj roengz gwnz byaek bae, loegyebyeb, caen ndeiyawj. Gyaeujho ak cawz haeusing haeuhauz, daxmeh cawj bya seiz ciengz dawz gyoengqde dwk roengz bya bae.

Siengj daengz daxmeh cawj gij byaek rangfwtfwt haenx, goho gyaeujho hix miz goenglauz, gou nyaenx mbouj ndaej rubrouh gyoengqde.

(seiq nienzgaep Ciengj Yij)