Mbwn laep lo, ronghndwen moengzmoengz loengzloengz ciuq gwnz dieg, couh lumj miz caengz baengzsa he cw gwnz dieg, gyanghwnz, gwnzmbwn cebyauyau haenx cungj miz gij ndaundeiq baenz aen baenz aen venj youq haenx, baez myab baez myab, geijlaiz lumj gij lwgda yaepmyabmyab haenx ha! Gou nyienh guh ndawde aen he! Danghnaeuz gou couh dwg gyoengq ndaundeiq haenx ndawde aen he……

Danghnaeuz gou dwg aen ndaundeiq he, gou nyienh nem youq ndaw rungj ronghndwen daxbuz raeujrub haenx, dinghdingh dwk dingq de gangj gij gojgaeq ndeidingq haenx, gangj cangzngoz、douqnyawh、go’gveiqva daengj doengh gij gojgaeq neix. Gou couh lumj laeq nyez caengz roxsoq he, cungj dwg caeuq rongh- ndwen daxbuz gangjriu;gou couh lumj laeq lwgnyez gaenx he, ronghndwen daxbuz gangj gijmaz gou cungj nyinhcaen bae guhbaenz; gou couh lumj laeq lwgnyez maij guh’unj he, caeuq ronghndwen daxbuz doxndiep doxgyaez……

Danghnaeuz gou dwg aen ndaundeiq he, gou nyienh guh aen ceiq ndongq haenx, mboujlwnh seizlawz, mboujlwnh dieg lawz, cungj soengq faenh rongh he hawj gyoengq boux byaij roen laep haenx, cungj soengq rongh hawj gyoengq nyez lau laep haenx, cungj bang gyoengq lwgnyez ra mbouj raen roen haenx ra raen diuzroen baema ranz……

Danghnaeuz gou dwg aen ndaundeiq he, gou nyienh guh aen ceiq manzgyaengj he, youq mwh lwgnyez ninz dwk diemzsubsub seiz, caegcaeg gwih duzdoengz mbin haeuj ndaw fangzhwnz loq gyoengqde bae, bienqbaenz dangz、 mak、 vanzgi……Hawj gyoengqde gwn daengz yinx、caemz daengz naiq! Hawj lwgnyez vaiqvued, geijlai cig ndaej gou aen ndaundeiq iq neix angq ha!

Danghnaeuz gou dwg aen ndaundeiq he, gou nyienh guh aen ceiq simsienh haenx, youq henz cueng dongx gyoengq lwgnyez gyad faeq haenx, hawj gyoengqde mbouj caiq gamjdaengz gadog, mbouj caiq raen mbwq; gou nyienh vih dahniq gai habfeiz haenx soengq bae raeujrub, hawj de mbouj caiq dwglau; gou nyienh lumj caencik lwglan nei bae buenx gyoengq bouxlaux gagyouq haenx gangjgoj, hawj gyoengqde mbouj caiq mbwqmbwt……Gou nyienh guh aen ndaundeiq simsienh he, byawz miz saeh aeu bangcoh, gou couh bangcoh gyoengqde, hawj gyoengqde mbouj caiq gadog, mbouj caiq dwglau, mbouj caiq mbwq.

Danghnaeuz gou dwg aen ndaundeiq he, gou nyienh guh gwnz seiqgyaiq aen ndaundeiq ceiq gyaeundei、 ceiq ndongq、 ceiq simsienh youq ceiq bingzfanz he! Danghnaeuz gou caen dwg aen ndaundeiq he, gou nyienh caenh rengz swhgeij bang gyoengqvunz guh saeh!

(roek nienzgaep Ciz Gizgiz)