Youq ndaw swnghhoz, daxmeh doiq gou gig yiemz, coengzlaiz mbouj riu gvaq.

Daxboh ngoenznaengz hong haemq nyaengq. Ciuqgoq gou caeuq ndaw ranz gij hongranz hongrog cungj dwg baengh daxmeh boux ndeu gag guh. Vihliux hawj gou ciensim hagsib caeuq vaiqvued majhung, daxmeh lumjbaenz yaek sawj liux daengx ndang rengz. Gou moix ngoenz yawjraen de baenzneix sinhoj, cungj siengj gou wnggai bang de guh di gijmaz saeh.

Ceiqgaenh daxmeh bingh lo, ae lai ae raeuh. Gou siengj gou miz gihvei bang daxmeh guh di saeh lo. Daxmeh naiqnueknuek bang daengx ranz vunz cawj caeuz seiz, gou ganjvaiq bae bang daxmeh mbit byaek swiq byaek, bae guh boux bangfwngz de.

Gwn caeuz sat le, gou ciengj bae swiq duix. Lij gag bae sij cozyez, caenhguenj gou boux ndeu gag youq ndaw rug lij miz di dwglau, hoeng gou mbouj caiq heuh daxmeh daeuj ndaw rug buenx gou lo. Gou aeu hawj daxmeh miz lai di seizgan, hawj de guh gij saeh de siengj guh haenx.

Gyanghaemh 10 diemj cung, gou swiq ndang le couh yaek ninz lo，daxmeh ndaejhoengq lo, de naengh roengzdaeuj hai dennauj yawj sinhvwnz. Gou siengj, daxmeh naengh youq haenx itdingh nit, deng nit bingh’ae gya naek couh mbouj ndei lo. Ndigah gou ganjvaiq bae daek bat raemxndat he, dawz daengz henz eij daxmeh, naeuz hawj de:“Daxmeh, mwngz ceh din couh mbouj nit lo.” Daxmeh unqswnh dwk yawj gou, ndaw bak nam naeuz:“Baujboiq gou majhung lo, rox simin daxmeh lo……”Seiz- haenx, gou raen daxmeh riu lo.

Daxmeh riu le gig gyaeundei, gij riu haenx gig ronghlwenq, gou maqmuengh daxmeh moix ngoenz cungj miz haujlai saeh ndaej simhai, gou itdingh haenqrengz guh ndaej engq ndei.

(seiq nienz- gaep Beiz Yi)