Bonjbauq siusik (gicej Dangz Lungz) 11 nyied 25 hauh daengz 29 hauh, Swcigih Minzyijveij youq Nanzningz gawjbanh bi 2013 daengx gih Vahcuengh Sawcuengh fanhoiz yezvu guzgan beizyinbanh. 26 hauh banhaet guh hai ban yizsi nem gyangjco, youq seizhaenx, Swcigih Minzyijveij fucujyin Yangz Gijbyauh guh hai ban gangjvah nem cienmonz gangj le《Minzcuz Yijvwnz Gihbwnj Lijlun Nem Cwngcwz》. Gvangjsih Minzcuz Dayoz Vaigozyij Yozyen mizgven lingjdauj camgya le hai ban yizsi.

Yangz Gijbyauh gangj le geij aen vwndiz, baugvat doenghgij gietdingh hong vah saw minzcuz, baenzlawz gaijgez gij naemjngeix doxdoengz hong vah saw minzcuz, baenzlawz gaemdawz caemhcaiq yungh ndei yungh liux gij minzcuz yijvwnz fazliz fazgveih cwngcwz dangj nem guekgya raeuz nem gij naemjsiengj hong vah saw minzcuz daengj. Yangz Gijbyauh giengzdiuh, doenghboux guh hong vah saw minzcuz aeu gyoep baenz seiq aen naemjngeix doxdoengz: It dwg yaek haeujsim gyaez ndei hong vah saw minzcuz; ngeih dwg aeu miz gij naemjngeix doxdoengz couhdwg vah saw minzcuz dwg gij hongdawz doxgyau nem swnjcienz minzcuz vwnzva; sam dwg aeu rox cingcuj gij hingzsi nem yinvu hong vah saw minzcuz; seiq dwg gaemdawz caemhcaiq yungh ndei yungh liux minzcuz yijvwnz fazliz fazgveih cwngcwz. Yangz Gijbyauh iugouz beizyinbanh yozyenz aeu ra doiq gizdieg vah saw minzcuz ndaej yungh haenx, doenggvaq hagsib、doxgyau, daezsang Vahcuengh Sawcuengh fanhoiz suijbingz, youq gizdieg guh hong vah saw minzcuz haenx guh ndaej ndei, guh ndaej baenz.

Youq beizyin seiq ngoenz ndawde, Swcigih Gyauyuzdingh Minzcuz Gyauyuzcu Sawcuengh Gyaubenhsiz yizsinj Lingz Hingh- ningz、Cunghgoz Minzcuz Fanhyizgiz Sawcuengh Vahcuengh Siz fanhyiz Lanz Ligoz、fuyizsinj Vangz Veih- ningz daengj gonqlaeng gangj le《Baenzlawz Benhciz Nem Fanhoiz Sawson Sawcuengh》《Fanhoiz Gihbwnj Lijlun》《Baenzlawz Fanhoiz Cwnglunvwnz》 daengj. Gij gyangjco neix hawj gyoengq yozyenz ndaej rox gig lai.

Miz 27 boux Vahcuengh Sawcuengh fanhoiz yezvu guzgan camgya baez beizyinbanh neix, gyoengqde faenbied daj Swcigih Minzyijveij、Gvangjsih Minzcuz Bause、Gvangjsih Samnyiedsam Cazcise、Gvangjsih Sawcuengh Yozyau nem Nanzningz、Bwzswz、Liujgyangh、Hozsiz、Cungzcoj daengj si nem bouhfaenh yienh(si、gih) minzyij bumwnz daeuj, gyoengqde hopheux hong fanhoiz Vahcuengh Sawcuengh, gangj gingniemh, vixok vwndiz, haeujlaeg bae naemjngeix nem doxyaeng baenzlawz gaijgez ndei vwndiz.