●Daj bineix daeuj, Cungzcoj Si Minzveij cizgiz gaihcanj 2013 nienz vih vunzlai banh saehsaed hanghmoeg gensez, roengz 463.7 fanh maenz guh roensuijniz mbanj gaep 20 diuz, gungh 15.3 goengleix. Daengz 10 nyied daej, gij roen neix gaenq guhsat 19 diuz, gungh bu suijniz 14.5 goengleix, guhsat daengx bi yinvu 94.77%. Hangh- moeg guh daengz 15 aen yangh(cin) 20 aen cunh 20 aen mbanj, 3650 hoh 13438 vunz souh’ik.

(Luz Gunh)

●Gaenh geij ngoenz daeuj, Yungzanh Yen Daboh、Fuzsiz、Swdingj daengj 12 aen yangh(cin) lajmbanj miz 6000 lai moux makraeq ndaej fungsou. Gij makraeq neix bineix daihgaiq ndaejsou 100 fanh goenggaen. Dangqnaj, ndaw haw gai moix goenggaen 10 maenz, beij bi’gvaq doengzgeiz lai hwnj maenz ndeu. Dan gai makraeq couh hawj moix ranz ndaej souhaeuj mbouj noix.

(Veiz Cujswz)

●Bineix, Ningzmingz Yen baij vunz haeuj mbanj diegbya、henzguek bae cuengq denyingj hawj vunzlai yawj, 1 daengz 10 nyied, daengx yienh gungh cuengq denyingj 1450 ciengz, doenghboux nungzminz ndaw mbanj yawj denyingj haenx gungh miz 72.5 fanh vunz(baez).

(Couh Yizgangh)

●Bineix Yungzsuij Myauzcuz Swciyen aeundaej cienzngaenz banggungz 1470.4 fanh maenz, aeu neix daeuj guh roensa doeng mbanj 12 diuz、roensuijniz doeng mbanj 10 diuz、gunghcwngz yinxraemx iq aen he、gonjraemx 2600 mij, gijneix gaenq guhsat 80%. Gij hanghmoeg neix gungh guh doh 26 aen mbanjgungzhoj, 4375 hoh 1.901 fanh vunz souh’ik.

(Siz Gveiz)

●Daj bineix daeuj, Nazboh Yen minzcuz bumwnz roengz 255 fanh maenz, youq Bingzmung Cin Nazvan Cunh Mbanjnazvan daengj 5 aen mbanj saujsu minzcuz comzyouq haenx saedhengz mbanj minzcuz doxgiet sifan gensez.

(Vangz Bizvaz Liengz Yenjvaz)