Vunz naeuz lajmbwn mbouj miz byawz hawj gwnringz ndwi, hoeng hagdangz dou cix miz haeuxringz hawj dou gwnndwi, moix daengz mwh haihaeux, “haihaeux lo! Haihaeux lo! Youh ndaej gwnringz ndwi lo, neix dwg cwngfuj bued ngaenz hawj dou gwnringz ndwi!” Gij sing neix boux riengz boux gangj. Dauqdaej dwg mbouj dwg o?

Laxlawz, haeuxringz gwnndwi dwg cwngfuj vihliux gemjmbaeu cienzgwnringz gyoengq hag- seng lajmbanj bienbik, fat cienz hawj gyoengq hagseng ranz liz hagdangz gyae haenx banringz youq hagdangz gwnringz.

Haeuxringz hawj ndwi ndaej soiz cienzgwnhaeux lwghag lajmbanj, beijlumj: Gaxgonq mboujmiz haeuxringz hawj ndwi seiz, mbangj hagseng lajmbanj bienbik ranz liz hagdangz gyae youq hagdangz ninz haenx, aenvih ranz gungz gingciengz gyau mbouj hwnj cienzgwnhaeux, cungj ngaiz dungxiek. Seizneix miz haeuxringz hawj gwnndwi le, ndaej soiz ndawranz hagseng lai lo.

Haeuxringz hawj ndwi mboujdanh ndaej soiz gyoengq boux hagseng lajmbanj bienbik ninz youq hagdangz haenx, hix ndaej soiz gyoengq hagseng ranz liz hagdangz gyaez hoeng youh mbouj ndaej youq hagdangz ninz haenx, beijlumj: Miz haeuxringz hawj ndwi le, gyoengq hagseng ranz gyae haenx banringz hix ndaej louz youq hagdangz gwnringz, youq ndaw gyausiz boujcung ndang- rengz, ciep roengzdaeuj lajbyonghngoenz miz rengz hwnjdangz. Gaxgonq mbouj miz haeuxringz hawj gwn ndwi, gyoengq hagseng ranz gyae haenx ngoenzngoenz banringz cungj ganj baema ranz gwnringz le caiq muengzhoebhoeb ganj daeuj hagdangz, yienghneix gig sai rengz, lajbyongh- ngoenz mbouj miz saekdi cingsaenz, mbouj miz sim hwnjdangz dingq gangj goq, hagsib yaugoj gig mbouj ndei; miz di doengzhag ranz saedcaih daiq gyae lo, banringz baema gwn mbouj gib, banhaet couh daiq haeux daeuj hagdangz, hoeng daengz banringz seiz, haeux gaenq gyoet lo, gwn haeuxgyoet dungx mbouj ndeiyouq, lajbyongh- ngoenz hix mbouj miz cingsaenz, hwnj mbouj baenz dangz.

Linghvaih, haeuxringz hawj ndwi lij hawj dou ndaej lienh gag guh saeh, youq hagdangz, dou ndaej hableix faenboiq seizgan hagsib、lienhndang, neix doiq dou daengzcog majhung le ok sevei bae guhhong gig miz bangcoh.

Haeuxringz hawj ndwi, sawj dou majhung engq vaiq; haeuxringz hawj ndwi, sawj ranz lajmbanj bienbik ndaej gemjmbaeu diuzrap; haeuxringz hawj ndwi, sawj gyoengq hagseng mbouj ndaej youq hagdangz ninz haenx miz rengz; haeuxringz hawj ndwi, sawj dou ndaej youq hagdangz gag lienh swhgeij. Haeuxringz hawj ndwi, caen dwg aen hengzdoengh hungmbwk he, docih cwngfuj gvensim dou, haeuxringz hawj ndwi buenx gou majhung! Gou gyaez haeuxringz hawj ndwi!

(haj nienzgaep Liuz Mingz)