Majlingzsuz dwg cungj doxgaiqgwn gig bingzciengz he, byawz cungj gwn gvaq, hoeng goulau mbouj miz geijlai boux doengzhag rox cauj aen byaek neix bw. Vihliux guhbaenz aen yinvu lauxsae roengzhawj neix, ngoenzneix gou gaen daxboh hagsib cauj majlingzsuz.

Gou naeuz hawj daxboh naeuz lauxsae roengz yinvu heuh hag cauj majlingzsuz le, daxboh angq dwk son gou. Daxboh hainduj son gou cauj majlingzsuz lo, de sien dawz geij aen majlingzsuz cuengq youq gwnz daizheng, swiq caxbyaek le, ronq majlingzsuz, cij dingqnyi raq sing gvaekgvaekgvaek maedmaed he, yaepyet majlingzsuz couh bienq baenz diuz lo, yienghneix liuh couh bwh ndei lo.

Miz liuh le, couh hainduj cauj lo, daxboh dawz rek hwnj gwnz feiz bae, caj gij raemx ndaw rek hawq le, daxboh ndingq di youz roengz rek bae. De doq guh doq naeuz hawj gou:“Ndingq youz seiz aeu siujsim, mboujnex youz rox sinz hwnj ndang daeuj. Ndingq youz hix mbouj naengz ndingq daiq lai, ndingq lai majlingzsuz daiq youz mbouj ndeigwn.” Gangj sat, de yawj gij youz ndaw rek, gamjdaengz miz di aeng le, dawz aen buenz cang gij majlingzsuz ronq ndei haenx baez ndingq, cij dingqnyi “ca” sing ndeu, majlingzsuz cienzbouh ndingq roengz rek bae lo. Daxboh youh aeu gucanj gig vaiq canj dwk, cijraen gaiq gen daxboh gingz hwnj gingz roengz, gaiq gucanj hix youq ndaw rek canj swix canj gvaz, gou yaengx lwgfwngzmeh haenh daxboh. Daxboh cauj geij faen cung le, naeuz gou: “Mwngz hix yawj yaep he lo, vaiq daeuj doenghfwngz caujcauj.” Gangj le, ndenq fagcanj hawj gou. Youq ndaw fwngz gou, fagcanj couh mbouj dingqgangj lo, de lumj lwgnyez manzgyaengj he, yaep he gvaq mbiengj neix, yaep he gvaq mbiengj haenx, majlingzsuz cauj mbouj ndei, sinz ok rek daeuj mbouj noix. Daxboh raen gou fwngz mbouj gvai geijlai, youh caiq son gou, ciemhciemh dwk, fwngz gou beij haxbaenh sug lai lo.

Gou caeuq daxboh doengzcaez okrengz, majlingzsuz gig vaiq couh cauj baenz lo, gou aeu buenz daeuj cang dawz hwnj daiz, cimz amq he, caen rang hw! Gij byaek swhgeij cauj couh dwg ndeigwn, mboujnex vunz vihmaz naeuz “cihgeij doenghfwngz, miz gwn miz daenj” ne!

Gou gwn dwk gwn dwk, sawqmwh gamjdaengz cihgeij yienznaeuz hag rox cauj majlingzsuz lo, hoeng cauj de caen mbouj yungzheih, gou cib’it bi neix ndawde, mbouj rox gwn gvaq geijlai majlingzsuz bohmeh cauj haenx, gyoengqde caen dwgrengz ha!

(haj nienzgaep Du Lingz)