Seizcou, dwg aen geiqciet saek lai he, dwg aen geiqciet lumj sei lumj veh he, dwg aen geiqciet fungsou he. Seizcou baez daengz, haujlai doxgaiq cungj youq ndaw geiqciet neix baij ok gij gyaeundei akmaenh swhgeij.

Youq ndaw seizcou lai saek lai yiengh neix, haujlai va gyaeundei cungj doxciengj hai angj. Vagut、gveiqva、valwgbaenq…… Gij rang gveiqva rox caenx haeuj ndaeng daeuj, vunzlaux naeuz gveiqva rang ndaej cib leix gyae, cijaeu mbup mbat he couh daengx ndang soengswt, lumzgeiq naetnaiq. Gveiqva duj va miz haj roek limq va, gij va dingzlai dwg saekhenjgim、saekhenjoiq、saekhau sam cungj saek neix. Gangj daengz saek va, vagut cij suenq dwg lai saek lai yiengh, saekceb、saekhau、saekmaeq、saeknding lai daengz geq mbouj liux, gyoengqde lumj angjfwngz neix menhmenh ajhai youq ndaw rumz riuhoho.

Youq ndaw aen geiqciet neix, lwgmak hix mbouj gamsim doeklaeng, cungj siengj nyoengx daeuj yawj aen biengz raeuz. Makleizsan daj heuloeg bienq baenz henjnding, gij naed nohmak baenz naed baenz naed ndongqrikrik lumj naed raemxraiz nei, hawj vunz sij mbouj ndaej haeb de. Gwn amq he, couh lumj miz geu raemxmboq vandiemz he lae roengz sim bae. Makleizsan cawz le feihdauh dwgbak le, lij baenz guh yw, gij naeng de ndaej fuengz oksiq, dwg cungj mak gig ndei ndeu. Makmbae hix henj lo, seizneix makmbae miz song cungj, cungj he unq cungj he ndongj, cungj ndongj haenx gwn hwnjdaeuj youh byot youh sangj, cungj unq haenx lumj aen youh aen daengloengz iq, youh lumj aen naj launyaenq iq nei, gwn haeuj bak gig raeuz, couh lumj vad vazbanj ityiengh vad haeuj bak bae, vad roengz sim bae. Maklaeq hix baenz lo, naeng de miz caengz bwnnyungz he, bok naeng le youh miz caengz byuk ndongjgyatgyat. De couh lumj boux cansw giengiengz he, henhoh gij noh de, mbouj hawj vunz gwn de. Bok caengz byuk haenx le, lij miz caengz biux he, bok caengz biux haenx le cij raen gij noh henjrwgrwg de.

Seizcou caen dwg aen geiqciet lai saek lai yiengh he ha.

（roek nienzgaep Hingz Youjginh）