Haeuj doeng mbwn nit le, haujlai vunz cungj haengj gwn hojgoh. Mizgven conhgyah daezsingj naeuz, ciengx ndang aeu haeujsim gwn bouj doxdaengh, cawz gwn huqndat roxnaeuz gijgwn ndat le, habdangq gwn di huqgyoet caeuq byaekliengz ndeu, doiq ndang vunz miz ik.

Seizdoeng yienznaeuz mbwn nit, danhseih vunzraeuz daenj buhvaq lai, noix hozdung, gij ndat ndaw ndang mbouj sanqfat okbae vaiq, gyahwnj vunzraeuz gwn doxgaiq cungj dwg gwn huqndat, aenbwt caeuq aendungx huj hoengh, rox hawj donh saidiemheiq baih- gwnz caeuq aendungx ndaej bingh.

Siengj siucawz seizdoeng hwnjhuj, vunzraeuz mboujfuengz gwn di huqgyoet caeuq byaekliengz ndeu, lai gwn raemxgoenj liengz, yienghneix ndaej yawhfuengz baenz dwgliengz、conghhoz haenz in. Gyanghaet hwnqdaeuj le gwn boi raemxgoenj liengz ndeu, ndaej hawj gej doeg goengnaengz bwtdaep lai ak, caemh ndaej cungswiq aenmak, coi sup haeuj caeuq baiz ok, hawj vunz noix ndaej bingh, caemhcaiq hawj hezyaz doekdaemq roengz- daeuj, yawhfuengz sim saek dai.

Doiq boux vunz biz daeuj gangj, habdangq gwn di byaekliengz ndeu mizleih gemjbiz. Cawz haeujsim lienhndang le, habdangq gwn di byaekliengz ndeu, ndaej bik hawj aenndang gag miz raeuj, lai siu di lauz ndeu okbae, dabdaengz gemjbiz muzdiz. Gawqyienz siengj gemjbiz caeuq gwn ndei, aeu gwn di byaekliengz ndeu cij ndaej.