Vih dingj nit caeuq fuengz bingh, seizdoeng wnggai gwn di gijgwn hamz ndat lai caeuq gijgwn hamz veizswngh- su lai ndeu. Daegbied dwg lai gwn di gijgwn hamz danbwzciz lai haenx, lumj nohcing、nohbit nohgaeq、gyaeqgaeq、bya、gij doxgaiq aeu cij guh、gij doxgaiq aeu duh guh daengj. Lajneix bang mwngz doigawj yiengh gijgwn naengz dingj nit ndeu, de couh dwg haijdai.

Haijdai yingzyangj gig lai, ndawde hamz miz denj、diet、gai、ganhlucunz、huzlauxbaeg doxgaiq daengj cwngzfwn. Daj cunghyih gakdoh daeuj gangj, raemx ndaw haij gyoetgyat, haijdai maj youq ndaw haij bonjndang de dingj nit gaenq gig ak lo, caemhcaiq feih de hamz ndaengq, ciengzgeiz gwn de ndaej raeuj bouj heiq mak. Ndigah, seizdoeng gwn haijdai ndaej hawj ndang vunz lai dingj ndaej nit.

Linghvaih, haijdai hamz denj lai, denj ndaej coi gyazcangsen iemqok le canjseng ndat okdaeuj. Itbuen vunz- hung moix ngoenz aeu miz veizlieng yenzsu denj ngamq dwg 150 veizgwz baedauq, danhseih youq 100 gwz haijdai ndawde, denj couh hamz miz 204 veizgwz baenzlai lo.