Seizdoeng ndwenlab cingq dwg seizciet gwn nohyiengz. Youq ndaw seizdoeng, din fwngz vunzraeuz caepcat, heiqlwed lae baedauq mbouj swnh. Gwn nohyiengz ndaej bouj mak cangq yiengz、bouj raeuj bouj heiqlwed、sek dungx cangq mamx. Vihneix, seizdoeng gwn nohyiengz, gawq ndaej dingj rumznit, youh ndaej bouj aenndang.

Nohyiengz beij nohmou unqoiq, hamz danbwzciz caeuq veizswnghsu gig lai. Ndawde hamz ndat beij cungj noh wnq lai, seizdoeng ciengz gwn de ndaej ik heiq bouj haw, coi lwed lae baedauq, hawj bouxvunz lai dingj ndaej nit. Gwn nohyiengz ndaej demgya siuhvameiz, baujhoh bangx dungx, yungzheih siuvaq, lai gwn de caemh ndaej daezsang rengz dingj bingh, ndawbiengz miz aen gangjfap “siengj lai souhgyaeu, lai gwn nohyiengz” baenzneix naeuz.

Nohyiengz ceiq ndei dwg aeuq gwn, aenvih aeuq gwn noh de yungzheih naemz, heih siuvaq. Boiq maksanhcah roxnaeuz duhheu aeuq gwn ndaej siu haeugyaenq; boiq lauxbaeg hau、maenzcienz aeuq gwn ndaej bouj ik cangq mak cangq mamx、ik dungx bingz daep; boiq lauxbaeg nding aeuq gwn ndaej bouj haw ik heiq.