Haenx dwg gij saeh mboengq gonq, seizseix gou lij geiq ndaej gig cingcuj……

Singhgiz roek, gou sim’angq fwtfwt okbae guhcaemz, sawqmwh dingqnyi sing meuz iq heuh “myau myau”, yi, neix dwg miz maz saeh, gou nyeux gyaeuj baez yawj, laxlawz dwg duz meuz iq he, yawj daeuj de dwg ra mbouj raen roen ma ranz lo. Baenzlawz guh ne? Seizneix de ndwn youq cungqgyang loh, gizgyae miz sing lunglung hai ci cienz daeuj, baenzlawz guh? Dauqdaej baenzlawz guh? Gou fwt cung gvaqbae, umj meuz iq dauq henz, gaeuq diuz mingh iq de lo, hoeng ranz duz meuz iq neix youq gyawz ne? Duz neix rox mup gij heiq ra roen ma ranz ba? Gou rubluh duzde song mbat, cuengq de byaij, hawj de gag bae ra meh de lo.

Hoeng mbouj byaij geij nanz, couh dingqnyi meuz iq swenjngeungeu, gou buet gvaqbae baez yawj, laxlawz dwg geij daeg nyez cingq aeu rin ndek meuz iq, meuz iq in dwk rouxringx youq gwnz namh, gou yawj mbouj ndaej lo, cung hwnjbae umj meuz iq hwnjdaeuj, ndaq gyoengq nyez haenx:“Sou guh gijmaz? Sim baenz doeg, meuz iq seng daeuj dwg hawj sou ndek ma? Simriwx lai lo.”

Gyoengqde deng gou ndaq dwk najmong liux, haemz mbouj ndaej ra congh namh con roengzbae, najnding dwk ngaem gyaeuj sing daemq naeuz:“Dou loek lo, hoeng duz meuz neix dwg ok gizlawz daeuj？”Gou naeuz: “Gou baenz- lawz rox, hojnaengz dwg byawz daj ndaw rongz rib de ma neix gveng ba!” “Yienghneix sim daiq doeg lo.”Yienznaeuz gyoengqde aeu rin ndek meuz iq, hoeng gyoengqde dwg ndek guhcaemz, mbouj baenzhaenx simdoeg, mbouj dwg siengj ndek dai meuz iq, gyoengqde rox meuz iq mbouj miz ranz seiz, cungj naemj geiqmaeuz, siengj ra vunz souciengx meuz iq. Hoeng ra byawz ciengx ne, boux he naeuz:“Meh gou ceiq gyaez meuz lo, cingq siengj ciengx duz he ne, duz neix hix haemq gyaeu, meh gou itdingh maij.”Doeklaeng daihgya gietdingh hawj ranz de ciengx.

Baema le, gou naemj: Doenghduz dwg baengzyoux gyoengqvunz raeuz, gaej aenvih cihgeij maij roxnaeuz mbouj maij couh nyinhnaeuz cungj doenghduz lawz wng mbouj wnggai lix, wnggai lai roengz ngaenz roengz rengz bae baujhoh doenghduz, raeuz seizneix lij mbouj rox doengh gij doenghduz haenx doiq lajbiengz caeuq vunzraeuz miz maz cozyung, danghnaeuz seizneix mbouj yawjnaek, mbouj henhoh gyoengqde, daengzcog duzde mued le, ok saeh yak saeh rwix, dou ienqhoij couh mbouj miz yungh lo.

Ndigah, dou aeu daj seizneix hainduj gvensim doenghduz, baujhoh doenghduz, aeu daj swhgeij guh hwnj, daj saeh iq guh hwnj, hawj doenghduz caeuq vunzraeuz baenz baengzyoux ndei.

(haj nienzgaep Veiz Gozvaz)