Geiqndaej geij ngoenz gonq, mwngz lwnh hawj gou: Dah sau iq 15 bi he deng moek youq laj ranzlak, boh de bouxdog vatgud 11 aen cungdaeuz,doeklaeng gaeuq ndaej de okdaeuj, dah haenx ndaej gaeuq le, got daxboh de ndaetndaet bae. Gangj coenz vah daih’it dwg: “Daxboh, baezlaeng gou caiq mbouj caeuq mwngz doxceng lo.” Laxlawz, caengz deihdoengh seiz, boh lwg de doxceng, ndigah……

Dingq aen goj neix le, gou saenqdoengh lo, gou gamjdoengh lo, miz cungj docih he nyoengx hwnj gyaeuj daeuj.

Geiq ndaej:

Gou bi lai seiz, mwngz cing gou, rex gou, son gou byaij loh. Mwngz cuengq fwngz gou, yawj gou byaij soemxsoemx saxsax, riu lo. Gou bauqdap mwngz, lienh le youh lienh, doeklaeng, hag rox byaij loh lo.

Gou seiq bi seiz, gig lau gwn yw. Baezhaenx, aenvih mbouj gwn yw, mwngz daj gou, haj yiengh lwgfwngz yaenq youq gwnz caekhaex gou, gou swenjnga’nga. Mwngz sim’in lo, cawx bienqhingz ginhgangh hawj gou. Gou bauqdap mwngz, hai bak riu lo, hoeng dauq haujlai nanz mbouj caeuq mwngz gangj vah.

Gou haj bi seiz, hwnj youwzyenz doeg ban iq. Mwngz cing gou bae hagdangz, gwnz loh mwngz naeuz “aeu dingqgangj, caeuq gyoengq baengz- youx iq doxndei”. Gou bauqdap mwngz, ciengzciengz ndaej lauxsae byaujyangz, naeuz gou gig dingqgangj.

Gou caet bi seiz, hwnj siujyoz doeg it nienzgaep, mwngz hawj gou gag bae hagdangz, naeuz hawj gou aeu nyinhcaen hagsib, lai gyau baengz- youx. Mwngz lau gou riengz mbouj hwnj doengzhag, cungj bang gou fuzsiz. Gou bauqdap mwngz, fuzsiz seiz cungj siengj deuz, siengj okbae guhcaemz.

Gou bet bi seiz, youq Ciet “Roek It” aeu ndaej “hagsib cizgiz fwnswj ciengjcang”. Mwngz gig angq, naeuz hawj gou aeu caiq haenqrengz hagsib.

……

Seizgan lae bae lumj raemx, bae yaep da, gou gaenq 14 bi lo, gaenq hwnj cunghyoz lo. Caiq yawj mwngz, gwnz gyaeuj gaenq miz haujlai byoemhau.

Hoeng gij gyaez mwngz cix mbouj rox geq, lumj gij rongh haj saek, gyuemluemx gou. Hawj gou miz rengz, hawj gou raeujrub.

Hojnaengz saek seiz, mwngz mbouj dwg boux baengzyoux ceiq ndei gou; saek seiz, hojnaengz gangj mbouj doxngamj, rox doxceng; saek seiz, gou hix mbouj lijgaij mwngz, saekmwh lij mbouj maij mwngz. Hoeng, mwngz ciuqyiengh gyaez gou lumj gaeuq，ciuqyiengh buenx gou, dingq gou gangjboq, dingq gou lwnh gij saeh saepsoiq, dingq gou gangj saeh siengsim.

Mwngz youq henz ndang gou, yawj gou majhung, yawj gou ciemhciemh hag rox giengiengz, hag rox gag guh saeh.

Mwngz seizseiz gvensim gou, henhoh gou. Hawj gou ndaej ingbaengh. Gij gyaez mwngz lumj goengqgya, yienghhaenx naek, yienghhaenx onj, mbouj guh sing dwk……

Daxboh, gou rox mwngz hix miz nyapnyuk, hix miz atlig, mwngz hix rox baegnaiq. Ndigah, gou caenh- liengh lijgaij mwngz. Gyayouz, daxboh!(Ganh Hauyenz)